Astanada 254 kásiporynda eńbek quqyǵynyń buzylý qaýpi joǵary
ASTANA. KAZINFORM — Elordada 254 kásiporyn eńbek táýekeli joǵary sanatqa engizildi. Bul týraly QR Eńbek jáne halyqty áleýmettik qorǵaý mınıstrliginiń Memlekettik eńbek ınspektsııasy komıtetiniń Astana qalasy boıynsha departamentiniń basshysy Erlan Ismaǵulov málimdedi.
Onyń aıtýynsha, eńbek janjaldarynyń aldyn alýda kásiporyndardyń tsıfrlyq kartasy negizgi quraldardyń birine aınalǵan. Bul júıe táýekeli joǵary uıymdardy aldyn ala anyqtap, olarmen nysanaly jumys júrgizýge múmkindik beredi.
— Qazirgi tańda eńbek táýekelderiniń kartasyna sáıkes, Astanada 254 uıym joǵary táýekel sanatyna, 392 uıym ortasha táýekel deńgeıine jatqyzylǵan, — dedi Erlan Ismaǵulov.
Departament málimetinshe, kásiporyndarda jıi tirkeletin zań buzýshylyqtar negizinen mindetti zeınetaqy jarnalarynyń, áleýmettik tólemderdiń jáne mindetti áleýmettik medıtsınalyq saqtandyrý aýdarymdarynyń ýaqytynda tólenbeýine qatysty.
Osyǵan baılanysty eńbek janjaldarynyń aldyn alý jumysy kúsheıtilgen. Memlekettik eńbek ınspektorlary prokýratýra organdarymen birlesip, táýekeli joǵary kásiporyndarmen turaqty túrde kezdesýler ótkizip, zań talaptaryn túsindirip jatyr.
Sonymen qatar eńbek qatynastaryn retteýde áleýmettik áriptestik tetikteri de mańyzdy ról atqarady. Osy maqsatta qala ákimdigi janynan áleýmettik áriptestik jáne áleýmettik-eńbek qatynastaryn retteý jónindegi úshjaqty komıssııa jumys isteıdi.
— 2025 jyly komıssııanyń 6 otyrysy ótkizildi. Bıyl bir otyrys ótti, jyl sońyna deıin taǵy 6 otyrys ótkizý josparlanyp otyr, — dedi ol.
Onyń sózinshe, 2026 jylǵa arnalǵan jospar aıasynda eńbek qatynastarynyń ashyqtyǵyn arttyrý jáne quqyq buzýshylyq táýekelderin azaıtýǵa baǵyttalǵan keshendi sharalar júzege asyrylyp jatyr.
Atap aıtqanda, ujymdyq sharttardy tsıfrlandyrý, eńbek sharttaryn biryńǵaı esepke alý júıesine engizý, sondaı-aq jumyskerlerdi óndiristegi jazataıym oqıǵalardan mindetti saqtandyrýmen qamtýdy keńeıtý kózdelgen. Sonymen birge, kásiporyndarda kásibı táýekelder baǵalanyp, jumys berýshiler men qyzmetkerler arasynda túsindirý jumystary kúsheıtilip jatyr.
Aıta keteıik, buǵan deıin Qazaqstanda bankrot kásiporyndardaǵy jalaqy bereshegi 53,7 mln teńgege jetkeni habarlanǵan edi.
