Astanada 25 mln teńgege baǵalanǵan 5 tonna nasybaı joıyldy
ASTANA. KAZINFORM — Astana qalasy aýmaǵynda aýdandyq ákimdikter men quqyq qorǵaý organdarynyń reıdtik is-sharalary barysynda taǵy 5 tonna nasybaı tárkilendi, dep habarlaıdy elorda ákimdiginiń resmı saıty.
Bul ónimniń jalpy quny 25 mıllıon teńgeden asady. Tárkilengen barlyq ónim joıyldy. Nasybaıdy joıý aktsııasy «Zań jáne tártip» qaǵıdaty men «Taza Qazaqstan. Astana — tazalyq pen tártiptiń úlgisi» keń aýqymdy ekologııalyq aktsııasy aıasynda ótkizildi.
Іs-sharany Astana qalasynyń ákimdigi men qalalyq Polıtsııa departamenti «AMANAT» partııasy janyndaǵy «Jastar Rýhy» jastar qanatynyń belsendileri jáne jeke áriptes — «Kazecotech» ǴTK JShS jáne Eýropa-Azııa «Jasyl ekonomıka» qaýymdastyǵy zańdy tulǵalar birlestiginiń qoldaýymen uıymdastyrdy.
— Nasybaıdy joıý aktsııasy óndiristik baza aýmaǵynda ótti. Ol medıtsınalyq qaldyqtardy ýtılızatsııalaýǵa arnalǵan arnaıy qondyrǵyda joıyldy. Bul — Qazaqstanda «jasyl» tehnologııalar men jabdyqtar tizilimine engizilgen jalǵyz qondyrǵy. Ol «Jasyl tehnologııalar jáne ınvestıtsııalyq jobalardyń halyqaralyq ortalyǵy» KEAQ tiziliminde bar. Osyǵan oraı, nasybaı sekildi shegilmeıtin qospalardy termııalyq jolmen joıý qorshaǵan ortaǵa zııan keltirmeıdi. Protsesti arnaıy komıssııa baqylady, — delingen ákimdik habarlamasynda.
Reıdtik is-sharalar barysynda elordanyń alty aýdanyndaǵy 500-den astam saýda orny tekserildi. Polıtsııa departamenti men aýdandyq ákimdikterdiń qyzmetkerleri shegilmeıtin temeki ónimderin satýdyń 100-den astam deregin anyqtady. Barlyq ónim tárkilenip, quqyq buzýshylar ákimshilik jaýapkershilikke tartyldy.
Reıdterdiń nátıjesinde quqyq buzýshylar Ákimshilik quqyq buzýshylyqtar týraly kodekstiń 196-babyna sáıkes 25 aılyq eseptik kórsetkish (AEK) kóleminde aıyppul salyna otyryp, ákimshilik jaýapkershilikke tartylyp jatyr. Barlyq ónim oqıǵa ornynda tárkilenedi.
Osydan buryn Túrkistan oblysynda polıtsııa saýdagerden 45 keliden astam nasybaı tárkilegenin jazǵanbyz.