Astanada 2,5 myńnan astam jumysshy qar tazalaýǵa shyqty
ASTANA. KAZINFORM – Elordada keıingi kúnderi qar aralas jaýyn-shashyn jaýdy. Osyǵan baılanysty kommýnaldyq qyzmet mamandary táýlik boıy kúsheıtilgen rejımde jumys istep jatyr.
Elorda ákimdiginiń málimetinshe, 15 naýryzda qar tazalaýǵa 2,5 myńnan astam jol jumysshysy jumyldyrylǵan.
15 naýryz kúni tańerteń qala kóshelerin qardan tazartýǵa 2,5 myńnan astam jol jumysshysy men 1,1 myńnan astam arnaıy tehnıka shyqty.
14 naýryzdan 15 naýryzǵa qaraǵan túni kommýnaldyq qyzmet polıgondarǵa 1400-den astam reıs jasap, 19 myń tekshe metrden astam qar shyǵardy.
Qys basynan beri elordadan 459,2 myń reıs, 6,3 mln tekshe metr qar shyǵaryldy.
Qalada qar tazalaý táýlik boıy aýysymdyq rejımde júrgiziledi. Birinshi kezekte ortalyq kósheler, jolaýshylar kóligi marshrýttary, aıaldamalar men trotýarlar tazalanady.
Kóktaıǵaq kezinde qala turǵyndarynyń yńǵaıly qozǵalysy úshin joldarǵa, trotýarlar men kóshelerge qum-tuz qospasy sebiledi. Avtokólik júrgizýshilerinen jolda muqııat bolý, jyldamdyq rejımin saqtaý suralady.
