Astanada 248 jarnama-aqparattyq nysan aýystyryldy
ASTANA. 27 tamyz. QazAqparat - Qazirgi ýaqytta Astana qalasy boıynsha jarnama-aqparattyq nysandardyń jalpy sany 1160 quraıdy, onyń ishinde 248-i «Astana qalasynyń aýmaǵyna qurylys salý erejesindegi» syzbaǵa sáıkes aýystyryldy. Bul týraly búgin qalalyq Máslıhattyń otyrysy barysynda Sáýlet jáne qala qurylys basqarmasynyń basshysy Vıtalıı Sıletskıı málimdedi.
«Qazirgi ýaqytta Astana qalasy boıynsha 1160 jarnama-aqparattyq nysan ornatylǵan. Menshik ıeleri óz betterinshe 248 nysandy alyp, Astana qalasynyń qala qurylysy keńesi bekitken tehnıkalyq sıpattamalar men ólshemderge sáıkes jańalaryna aýystyryp jatyr»,- dedi basqarma basshysy.
Onyń aıtýynsha, elordada jarnama-aqparattyq nysandardy ornalastyrý «Astana qalasynyń aýmaǵyna qurylys salý erejesiniń» shemalaryna sáıkes qatań túrde júrgiziletin bolatyn.
«Árbir orynnyń ózindik sáıkestendirý nomiri, paıda bolý tarıhy, mekenjaıy, gabarıttik ólshemderi jáne menshik ıesiniń ataýy men ımıdji bar» - dedi V.Sıletskıı.
Astana qalasynyń resmı saıtynyń aqparatyna qaraǵanda, elordada barlyq jarnama-aqparattyq taqtalar birdeı bolady. Ár jerde ornalasqan bılbordtardyń arnaıy ólshemderi jasalady. Aýdandyq mańyzdaǵy magıstraldarda jarnama-aqparattyq alańnyń aýdany 2-5 sharshy metr, qalalyq mańyzdaǵy magıstraldarda 12-18 sharshy metr jáne K-1 kólik joldary men shyǵaberis magıstraldarda 18-72 sharshy metr bolady.
