Astanada 242 patsıent qyzylshadan statsıonarlyq em alyp jatyr

Elordada 242 patsıent qyzylshadan statsıonarlyq em alyp jatyr. Onyń 174-i – bala. Bul týraly kommýnıkatsııalar qyzmetinde ótken brıfıngte elordanyń Qoǵamdyq densaýlyq saqtaý basqarmasynyń basshysy Álııa Rústemova málim etti, dep habarlaıdy Kazinform qalalyq ákimdiktiń resmı saıtyna silteme jasap. 

Spıker qyzylshamen syrqattanýshylyqtyń joǵary bolýy mektepke deıingi balalar uıymdaryn, mektepterdi, joǵary oqý oryndaryn, medıtsınalyq uıymdar men áskerı bólimderdi qosa alǵanda, uıymdasqan ujymdarda baıqalatynyn atap ótti.

«2023 jyldyń 9 aıynyń qorytyndysy boıynsha elordada qyzylshaǵa, qyzamyqqa jáne epıdemııalyq parotıtke qarsy josparly vaktsınatsııamen qamtý 77,5%, 22 245 bala egildi. 6-7 jastaǵy balalardyń qyzylshaǵa, qyzamyqqa jáne parotıtke qarsy revaktsınatsııamen qamtylýy – 78,8%», - dedi ol.

Astanada qyzylshamen syrqattanýshylyqtyń 96%-y vaktsınatsııalanbaǵan balalar men ekpe mártebesi belgisiz eresekter arasynda tirkelgen. Osy jyldyń 1 qarashasyna basqarma qoımasynda 29 419 doza mólsherinde qyzylshaǵa qarsy vaktsına bar, sondaı-aq 121 myń kontıngentti vaktsınatsııalaý úshin Úkimet rezervinen 121 000 doza qosymsha satyp alý kelisimi jasaldy.

«Qyzylsha aýrýy bar patsıentterge sapaly, qoljetimdi jáne ýaqytyly medıtsınalyq kómek kórsetý maqsatynda basqarma «qyzylshasy bar balalarǵa medıtsınalyq kómek uıymdastyrý týraly» buıryqty bekitti. Balalar arasynda qyzylshamen syrqattanýshylyqtyń ósýine baılanysty №3 MGDB tósek qory 500 tósekke deıin, onyń ishinde reanımatsııalyq tósek-oryn 20 tósekke deıin ulǵaıdy», - dedi Álııa Rústemova.

Sonymen qatar qazan aıynyń basynan bastap Qalalyq juqpaly aýrýlar ortalyǵynda qyzylshamen aýyratyn naýqastardy aýrýhanaǵa jatqyzý úshin 100 tósek ornalastyryldy, rezervte taǵy 100 eresekterge arnalǵan oryn bar.