Astanada 24 mektep ashyldy, onyń 16-sy – jaıly mektep
ASTANA. KAZINFORM – Astana qalasynyń ákimi Jeńis Qasymbek Instagram paraqshasynda elordadaǵy jańa mektepterdiń ashylýy týraly jazdy.
- Taǵy tórt jaıly mektep ashtyq. Olar Saraıshyq, Esil, Nura aýdandarynda ornalasqan. Jańa úlgidegi taǵy bir mektepti bir aı ishinde ashamyz. Osylaısha, ashylǵan jaıly mektepterdiń jalpy sany – 16. Oqý jylynyń basynan beri barlyǵy 24 mektep saldyq, - dedi ákim.
Ol jaıly mektepter Memleket basshysynyń ulttyq jobasy aıasynda salynyp jatqanyn atap ótti.
Máselen, «Otaý» shaǵyn aýdanynda (Saraıshyq aýdany) mektep bolǵan joq. Balalar basqa oqý oryndaryna barýǵa májbúr boldy. Endi munda 4 myń oqýshy ornyna (eki aýysymdy) arnalǵan mektep ashyldy. Bul mektep sondaı-aq №63 mekteptiń shamadan tys tolyp ketý máselesin sheshedi.
Al Qorǵaljyn tasjoly, 127 mekenjaıynda ornalasqan jańa oqý orny tyǵyzdylyǵy joǵary №90 mekteptiń qıyndyǵyn sheshedi.
- 2024-2025 jyldar aralyǵynda jańa formatta barlyǵy 24 mektep salynady. Olardyń 16-sy daıyn. Jaıly mektepter eki aýysymda 90 myńǵa jýyq oqýshy ornyn ashýǵa múmkindik beredi. Bul oqý oryndary qalanyń barlyq aýdanynda ornalasqan. Biz sol sııaqty aldaǵy jyldarǵa da daıyndalyp jatyrmyz. Máselen, 2025 jyly 20-ǵa jýyq mektep salyp, paıdalanýǵa berýdi josparlap otyrmyz, - dep jazdy Jeńis Qasymbek.
Jyl sońyna deıin «Jaıly mektep» jobasy aıasynda taǵy 28 aýyldyq mektep paıdalanýǵa beriletini týraly jazǵan bolatynbyz.