Elordada 23 myńnan astam aǵash apatty sanatqa jatady
ASTANA. KAZINFORM — Astanada 23 myńnan astam aǵash apatty sanatqa jatady. Bul týraly Astana qalasy Qorshaǵan ortany qorǵaý jáne tabıǵatty paıdalaný basqarmasynyń basshysy Dáýlet Dosqulov Qoǵamdyq keńestiń otyrysynda aıtty.
Onyń aıtýynsha, 2022 jyly qaladaǵy jasyl jelekterge túgendeý jáne orman-patologııalyq zertteý júrgizilgen.
— Zertteý nátıjesi boıynsha aǵash-buta ósimdikteriniń shamamen 70%-y nemese 1 mıllıonnan astamy saý kúıde. Álsiregen jasyl jelekterdiń úlesi — 29%, al 23 myńnan astam aǵash, ıaǵnı shamamen 1,5%-y apatty sanatqa jatady, — dedi Dáýlet Dosqulov.
Ol sondaı-aq túgendeý barysynda aǵashtardyń ornalasqan jeri, túri, dińiniń dıametri, bıiktigi, jas toby men jaı-kúıi esepke alynǵanyn aıtty.
Basqarma málimetinshe, qaladaǵy jasyl jelekterdiń túrlik quramy 158 aǵash tuqymynan turady. Onyń ishinde 135 túri nemese 85%-y japyraqty, al 23 túri nemese 15%-y qylqan japyraqty aǵashtar.
Eske salaıyq, buǵan deıin Ekologııa jáne tabıǵı resýrstar mınıstrligi Qazaqstanda 2021 jyldan beri otyrǵyzylǵan aǵashtardyń shamamen jartysy ǵana jersingenin málimdegen edi.
