Astanada 21 kósheniń ataýy ózgeredi
ASTANA. QazAqparat - Búgin Astana qalasy máslıhatynyń turaqty komıssııasynyń otyrysynda qala kóshelerin qaıta ataý máseleleri qaraldy. Oǵan onomastıkalyq komıssııa músheleri, qalalyq basqarmalardyń jáne qoǵamdyq birlestikterdiń ókilderi qatysty.
Bul týraly elorda ákimdiginiń resmı saıtynda habarlanǵan. «Qala turǵyndary onomastıkalyq komıssııanyń qaraýyna kóshelerdi qaıta ataý týraly ótinishterdi jıi joldaıdy. Qazirgi ýaqytta 23 ótinish kelip túsken. Onomastıkalyq komıssııa azamattardyń usynystaryn qarap shyǵyp, elordanyń 21 kóshesin qaıta ataý jáne eki kósheni biriktirý týraly sheshim qabyldady», - dedi Astana qalasy Tilderdi damytý basqarmasynyń basshysy Erbol Tileshov. Otyrysta adamdardyń aty-jónderin durys jazýǵa erekshe nazar aýdarylýy tıis ekendigi atap ótildi. Sonymen qatar belgili bir mekenjaıdy izdeýde qıyndyqtar týmaýy úshin azamattar kóshelerdiń ataýlarynyń ózgergeni týraly ýaqytyly habardar etilýleri kerek. Aıta keteıik, Tilderdi damytý basqarmasyna kelip túsken barlyq ótinishter QR Parlamentiniń jáne qalalyq máslıhat depýtattary, soǵys jáne eńbek ardagerleri keńesiniń, elordalyq JOO jáne QR Ulttyq muraǵatynyń ókilderi engen onomastıkalyq komıssııanyń qaraýyna usynylady, sodan keıin qalalyq máslıhattyń qaraýyna joldanady.
