Astanada 21 azamatqa «Til janashyry» qurmet belgisi tabystaldy (FOTO)

ASTANA. QazAqparat - Búgin Astanadaǵy QR Tuńǵysh Prezıdenti murajaıynda 21 adamǵa «Til janashyry» qurmet belgisi tabystaldy.Eske sala keteıik, «Til janashyry» qoǵamdyq birlestiginiń atalǵan nagradasy qazaq tiliniń órkendeýine atsalysyp júrgen azamattardy yntalandyrýdy kózdeıdi.

«Aramyzda týǵan tilimizdiń damýyna únemi úlken úles qosyp, naǵyz til janashyry bolyp júrgen elimizdiń túpkir-túpkirinen kelgen azamattar otyr. Elimizde tilge janashyrlyq kórsetetin adamdar kóptep sanalady. Osyǵan oraı, bıylǵy jylǵy bizge 100-ge jýyq usynys kelip tústi. Solardyń ishinen 21 úmitkerdi iriktep aldyq. Sizderdiń árqaısyńyzdyń orynyńyz bólek. Bárińiz de tildiń taǵdyry úshin tynbaı kúresip júrsizder, jas urpaqtyń tiliniń taza bolýyna atsalysyp kelesizder. Ózge ult ókilderiniń qazaq tilin úırenýine qamqor bolyp júrsizder, sondaı-aq jyldar boıy kóz maıyn taýysyp, sózdikter jasadyńyzdar, tildi damytýǵa arnalǵan jobalardy qoldap, ult metsenaty atandyńyzdar. Sonyń barlyǵy da eskerilip otyr»,-dedi marapattaý rásiminiń aldynda «Til janashyry» qoǵamdyq birlestiginiń qurmetti tóraǵasy, QR Prezıdenti Keńsesiniń bastyǵy, «QR Tuńǵysh Prezıdenti - Elbasy kitaphanasy» MM dırektorynyń mindetin atqarýshy Mahmut Qasymbekov. Aıta keteıik, osy qurmet belgisi bıyl besinshi ret tabystalyp otyr. Bıylǵy marapattalǵandar arasynda elimizdiń barlyq óńirlerindegi til janashyrlary, sonymen qatar Máskeý men Orynbor qalalarynda qazaq halqynyń mádenıeti men tilin nasıhattap júrgen azamattar qamtyldy.