Astanada 208 jas túlek ulttyq qolónerdiń 10 baǵyty boıynsha tálim aldy
ASTANA. KAZINFORM — Astanada Qazaqstan Respýblıkasy Mádenıet jáne aqparat mınıstrliginiń qoldaýymen «Kreatıvti ındýstrııalardy damytý qory» korporatıvtik qory júzege asyrǵan «Ulttyq qolóner mektebi» bilim berý jobasynyń qorytyndy is-sharasy ótti. Bul týraly vedomostvonyń baspasóz qyzmeti málim etti.
27 shilde men 12 tamyz aralyǵynda Qazaqstannyń ulttyq qolóner salasyndaǵy 10 úzdik sheber 8-20 jas aralyǵyndaǵy 208 qatysýshyǵa dástúrli qolónerdiń tehnologııalary men qyr-syryn úıretti.
Qazaqstan Respýblıkasy Premer-mınıstriniń orynbasary — Mádenıet jáne aqparat mınıstri Aıda Balaeva qatysýshylardy jobanyń sátti aıaqtalýymen quttyqtady. Ol tálimger sheberlerge, uıymdastyrýshylarǵa, ata-analarǵa jáne barlyq qatysýshylarǵa alǵys bildirdi.
Úkimet basshysynyń orynbasary búginde dızaın, sán, sáýlet, týrızm jáne kreatıvti ındýstrııalardyń ózge de baǵyttarynda ulttyq naqyshqa degen qyzyǵýshylyq artyp kele jatqanyn atap ótti. Onyń aıtýynsha, bul úrdis sheberlerge de, jastarǵa da jańa múmkindikterge jol ashady.
— Memleket basshysy ulttyq qundylyqtar men tarıhı-mádenı murany saqtaýǵa, shyǵarmashyl jastardy qoldaýǵa jáne kreatıvti ındýstrııalardy damytýǵa erekshe nazar aýdaryp keledi. Qolóner — halqymyzdyń ǵasyrlar boıy qalyptasqan turmys-tirshiligin, dúnıetanymy men kórkem talǵamyn tanytatyn asyl qazyna. Sondyqtan ulttyq qolónerdi saqtaý jekelegen buıymdardy jınaqtap, kórmege qoıýmen ǵana shektelmeıdi. Onyń eń senimdi joly — ónerdiń qyr-syryn sheberden shákirtke úıretip, urpaqtar sabaqtastyǵyn jalǵaý. «Ulttyq qolóner mektebi» jobasy osy mańyzdy mindetke naqty úles qosyp otyr. Endigi mańyzdy mindet — dástúrli qolónerdi saqtap qana qoımaı, oǵan zamanaýı dem berý. Dástúr ótkenniń jádigeri bolyp qalmaı, qazirgi damýdyń qýatty resýrsyna aınalýy kerek, — dedi Aıda Balaeva.
Joba qatysýshylary ulttyq qolónerdiń 10 baǵyty boıynsha tájirıbelik bilim aldy. Oqý baǵdarlamasyna zergerlik óner, aǵash pen teri óńdeý, kıiz basý, qysh óneri, kilem toqý, súıek oıý jáne dástúrli qoldanbaly ónerdiń ózge de túrleri engizildi.
«Ulttyq qolóner mektebi» aıasynda ınklıýzıvti bilim berýge de erekshe kóńil bólindi. Erekshe bilim berý qajettilikteri bar balalar úshin arnaıy top uıymdastyrylyp, sabaqtar olardyń shyǵarmashylyq qabiletin ashýǵa, usaq motorıkasyn jetildirýge jáne praktıkalyq eńbek daǵdylaryn qalyptastyrýǵa baǵyttaldy.
Qorytyndy is-shara barysynda tálimger sheberler men joba túlekterine sertıfıkattar tabystalyp, olardyń avtorlyq jumystary tanystyryldy. Sondaı-aq bilim berý baǵdarlamasynyń qorytyndysy shyǵaryldy.
Aıta keteıik, jobaǵa qatysýǵa 450-den astam ótinim kelip tústi. Konkýrstyq irikteý nátıjesinde 208 qatysýshy tegin bilim alý múmkindigine ıe boldy. Tálimger sheberlerdi irikteý de úlken qyzyǵýshylyq týǵyzdy. Elimizdiń barlyq óńirinen 331 ótinim qabyldanyp, tehnıkalyq irikteýden ótken 271 ótinimdi konkýrstyq komıssııa qarady. Nátıjesinde Qazaqstannyń ulttyq qolóner salasyndaǵy 10 úzdik sheber tańdaldy.
«Ulttyq qolóner mektebi» ulttyq mádenı murany saqtap, ony jas urpaqqa sabaqtastyqpen jetkizýge, dástúrli qolónerdi keńinen dáripteýge jáne ony zamanaýı kreatıvti ındýstrııanyń mańyzdy baǵyttarynyń biri retinde damytýǵa arnalǵan.
Joba balalar men jastardyń shyǵarmashylyq áleýetin ashýǵa, ulttyq ónerge qyzyǵýshylyǵyn arttyrýǵa jáne bolashaq kreatıvti ındýstrııa ókilderi úshin jańa múmkindikter qalyptastyrýǵa jaǵdaı jasaıdy.
Eske sala keteıik, elordada ulttyq qolóner mektebi shilde aıynda ashyldy. Úsh apta boıy elimizdiń ár óńirinen iriktelgen sheberler balalarǵa ulttyq qolónerdiń qyr-syryn úıretti.
