Astanada 207 qoqys úıindisi joıyldy, aıyppul 7 mln teńgege deıin ósti
ASTANA. KAZINFORM – Elordada ruqsatsyz qoqys úıindilerin joıý jáne quqyq buzýshylardy anyqtaý boıynsha júıeli jumys júrgizilip jatyr, dep habarlaıdy Astana ákimdiginiń resmı saıty.
Qazirgi ýaqytta qala boıynsha 207 qoqys úıindisi joıylyp, 270 myń tonnadan astam qoqys shyǵaryldy. Jumysqa 149-dan astam arnaıy tehnıka jumyldyryldy.
Aýdandar boıynsha derekter:
-
Baıqońyr aýdanynda – 53 úıindi joıylyp, 25 myń tonnadan astam qoqys shyǵaryldy;
-
Esil aýdanynda – 54 úıindi joıylyp, 82 myń tonnadan astam qoqys shyǵaryldy;
-
Saryarqa aýdanynda – 16 orynnan 19 myń tonna qoqys jınaldy;
-
Saraıshyk aýdanynda – 32 úıindi joıylyp, 32 myń tonna qoqys shyǵaryldy;
-
Almaty aýdanynda – 28 úıindi joıylyp, 20 myń tonna qoqys shyǵaryldy;
-
Nura aýdanynda – 24 núkteden 99 myń tonna qoqys shyǵaryldy.
Stıhııalyq qoqys úıindilerimen kúres tek olardy joıýmen shektelmeıdi. Baqylaýdy kúsheıtý, quqyq buzýshylardy anyqtaý jáne ákimshilik jaýapkershilikke tartý sharalary qolǵa alynǵan. Qalada mobıldi toptar men zań buzýshylyqtardy tirkeıtin iKomek júıesi belsendi jumys istep tur.
Ruqsat etilmegen oryndarǵa qoqys tastaǵan jeke tulǵalar men kásiporyndarǵa 100-den 1000 aılyq eseptik kórsetkishke deıin (393,2 myń – 3,9 mln teńge) aıyppul salynady. Bir jyl ishinde qaıta quqyq buzýshylyq jasaǵan jaǵdaıda aıyppul 200-den 2000 AEK-ke deıin (786,4 myń – 7 mln teńgeden astam) jetedi.
2025 jyldyń jeti aıynda Polıtsııa departamenti ákimshilik jaýapkershilikke tartty:
-
Qoǵamdyq oryndardy lastaǵany úshin (ÁQBtK 434-2-baby) – 11 250 quqyq buzýshyǵa 380 mln teńgeden astam aıyppul salyndy;
-
Qalany abattandyrý erejelerin buzǵany úshin (ÁQBtK 505-baby) – 19 570 adamǵa 34 mln teńge aıyppul salyndy.
Sonymen qatar, qoqys shyǵarý úshin paıdalanylǵan kólikter men ózge de zattardy tárkileý sharalary qarastyrylǵan. Bul qadam jańa ruqsatsyz qoqys úıindileriniń paıda bolýyn boldyrmaýǵa jáne qalanyń ekologııalyq jaǵdaıyn jaqsartýǵa baǵyttalǵan.
Aıta keteıik, SQO-daǵy Báıterek jáne Beskól turǵyndarynyń mazasyn qashyrǵan qoqys polıgony jabyldy.