Astanada 2029 jylǵa deıin 806 apatty úıdiń turǵyny kóshiriledi
ASTANA. KAZINFORM — Astanada 2029 jylǵa deıin 806 apatty úıdiń turǵynyn kóshirý josparlanyp otyr. Bul týraly elordadaǵy Qoǵamdyq keńestiń otyrysynda Astana qalasy Turǵyn úı jáne turǵyn úı ınspektsııasy basqarmasynyń basshysy Anýar Saıpov málim etti.
Anýar Saıpov Qoǵamdyq keńes múshelerine Astana qalasynda turǵyn úıdi renovatsııalaý baǵdarlamasynyń 2030 jylǵa deıingi jobasyn tanystyrdy.
— Baǵdarlamada elordanyń turǵyn úı qoryna júrgizilgen túgendeý nátıjeleri men qazirgi jaǵdaıdyń taldaýy qamtylǵan. Onda kondomınıým nysandarynyń jalpy múlkine aǵymdaǵy jáne kúrdeli jóndeý júrgizý, ǵımarattardy biryńǵaı arhıtektýralyq kelbetke keltirý, apatty úılerdiń turǵyndaryn kóshirý jáne olardy keıin buzý, sondaı-aq turǵyn úıdi óteý men qarjylandyrý kózderin aıqyndaý qarastyrylǵan, — dedi ol.
Basqarma basshysynyń aıtýynsha, elordada apatty jáne tozyǵy jetken úılerdi súrý baǵdarlamasy 2014 jyldan beri júzege asyrylyp keledi.
— 2014 jyldan bastap búginge deıin 286 apatty úıdiń turǵyndary kóshirildi. 4,5 myńnan astam otbasy jańa jaıly páterlerge qonystandy. 2023-2029 jyldarǵa arnalǵan turǵyn úı qoryn renovatsııalaý jobasy aıasynda 806 apatty úıdi kóshirý josparlanǵan. Sonyń ishinde Saryarqa aýdanynda — 82 úı, Baıqońyr aýdanynda — 104 úı, Almaty aýdanynda — 15 úı jáne Esil aýdanynda — 5 úı bar. Bul — bekitilgen jospar, — dep naqtylady Anýar Saıpov.
Sonymen qatar basqarma jyl saıyn turǵyn úı qorynyń tehnıkalyq jaǵdaıyna monıtorıng júrgizip, apatty jáne jóndeýdi qajet etetin nysandardy anyqtaıdy.
— Aýdan ákimdikteri jyl saıyn tekserilýi tıis úılerdiń tizimin usynady. Eger ǵımarattyń tozý deńgeıi 61 paıyzdan joǵary bolsa, ol úı kóshirý josparyna engiziledi. Al tozý kórsetkishi 61 paıyzdan tómen bolsa, turǵyn úıge kúrdeli nemese aǵymdaǵy jóndeý jumystary júrgiziledi, — dedi ol.
Qoǵamdyq keńestegi talqylaý qorytyndysy boıynsha keńes músheleri turǵyn úıdi renovatsııalaý baǵdarlamasynyń jobasyn qoldady.
Eske sala keteıik, elordada 14 myń adam apatty úıde turyp jatyr.