Astanada 2028 jyly álemdik munaı kongresi ótedi
ASTANA. KAZINFORM — Astana 2028 jyly Dúnıejúzilik munaı keńesiniń kongresin qabyldaıdy, dep habarlaıdy Energetıka mınıstrliginiń baspasóz qyzmeti.
Energetıka mınıstri Erlan Aqkenjenov Saýd Arabııasy Koroldiginiń Qazaqstan Respýblıkasyndaǵy Tótenshe jáne Ókilettielshisi Feısal Ál-Kahtanımen kezdesý ótkizdi.
Kezdesý barysynda taraptar energetıka salasyndaǵy ekijaqty yntymaqtastyqtyń ózekti máselelerin, sondaı-aq «OPEK+» aıasyndaǵy ózara is-qımyldyń perspektıvalyq baǵyttaryn, jańartylatyn energııa kózderin damytý jáne zamanaýı «jasyl» tehnologııalardy engizý máselelerin talqylady.
Erlan Aqkenjenov Qazaqstan men Saýd Arabııasy arasyndaǵy energetıkalyq áriptestikti odan ári nyǵaıtýdyń mańyzdylyǵyn atap ótip, álemdik energetıka naryǵyn damytý máseleleri boıynsha turaqty dıalog pen ustanymdardy úılestirýdiń mańyzdylyǵyna toqtaldy.
Erekshe nazar Er-Rııadta ótetin Dúnıejúzilik munaı keńesiniń aldaǵy kongresine aýdaryldy. Qazaqstan Kongresti basym jobalardy ilgeriletý, iskerlik baılanystardy keńeıtý jáne munaı-gaz salasyndaǵy halyqaralyq yntymaqtastyqty nyǵaıtý úshin mańyzdy alań retinde qarastyrady.
— Kezdesý barysynda Qazaqstannyń 2028 jyly Astanada Dúnıejúzilik munaı keńesiniń kezekti kongresin ótkizýge daıyndalyp jatqany da atap ótildi. Taraptar is-sharany daıyndaý jáne ótkizý barysynda tyǵyz ózara is-qımyl jasaýdyń mańyzdylyǵyn atap ótti, — delingen habarlamada.
Taraptar memleketaralyq ózara is-qımyl tetikterin odan ári jetildirý máselelerin de talqylap, energetıkalyq yntymaqtastyqtyń basym baǵyttary boıynsha syndarly dıalogty jalǵastyrýǵa daıyn ekenderin bildirdi.
Kezdesý qorytyndysy boıynsha energetıka salasyndaǵy áriptestik qatynastardy odan ári nyǵaıtýǵa jáne birlesken bastamalardy iske asyrýǵa ózara múddelilik rastaldy.
Osydan buryn Energetıka mınıstri Erlan Aqkenjenov eldiń soltústik óńirin gazdandyrýǵa qatysty pikir aıtty.
