Astanada 2026–2028 jyldarǵa arnalǵan ekologııalyq jospar tanystyryldy
ASTANA. KAZINFORM — Elordada 2026–2028 jyldarǵa arnalǵan qorshaǵan ortany qorǵaý jospary usynyldy. Qujatqa jergilikti bıýdjet esebinen júzege asyrylatyn 27 is-shara men joba engizilgen.
Bul týraly Astana qalalyq Qorshaǵan ortany qorǵaý jáne tabıǵatty paıdalaný basqarmasynyń basshysy Dáýlet Doskulov aıtty.
— Jospar bes negizgi bólimnen turady. Onda atmosferalyq aýany jaqsartý, sý nysandary men jaǵalaý ekojúıelerin qorǵaý, «Jasyl beldeýdi» damytý jáne qaldyqtardy basqarý sııaqty negizgi baǵyttardy qamtıdy. Sondaı-aq qujat aıasynda ekopark salý, ózen arnalary men sý aıdyndaryn qalpyna keltirý, jańa polıgon salý jáne zańsyz qoqys oryndaryn joıý sharalary qarastyrylǵan, — dedi ol qalalyq Qoǵamdyq keńestiń otyrysynda.
Atap aıtqanda:
Birinshi bólim atmosferalyq aýanyń sapasyn jaqsartýǵa baǵyttalǵan. Onda gazdandyrý, aýa sapasyn baqylaýǵa arnalǵan ekologııalyq beketter ornatý jáne jylý elektr ortalyqtaryndaǵy ekologııalyq jobalar qarastyrylǵan;
Ekinshi bólim sý nysandaryn qorǵaýdy qamtıdy. Onyń aıasynda Esil ózeninde, sonyń ishinde Aqbulaq pen Sarybulaqta, Nura–Esil kanalynda tabıǵatty qorǵaý sharalaryn júzege asyrý, sondaı-aq Kishi Taldykól kóliniń № 5 jáne № 7 ýchaskelerinde bıologııalyq tazartý jumystaryn júrgizý qarastyrylǵan.
Úshinshi bólim jaǵalaý jáne sý ekojúıelerin qorǵaýǵa arnalǵan. Bul baǵytta Taldykól kóliniń № 5 ýchaskesi mańynda ekopark salý, sondaı-aq Aqbulaq jáne Sarybulaq arnalaryn qaıta jańartý kózdelip otyr. Qazirgi ýaqytta Aqbulaq boıynsha joba iske asyrylyp jatyr, al Sarybulaq arnasyn rekonstrýktsııalaý jumystary kelesi jyly bastalady.
Tórtinshi bólim «Jasyl beldeý» aýmaǵyndaǵy aǵashtardy tekserý, olardy qorǵaý jáne qalpyna keltirý, ǵylymı zertteýler júrgizý, qyrǵaýyl fermasyn ustaý, ormanda órtti erte anyqtaý júıesin engizý jáne jasyl aımaqtardy jańartý jumystaryn qamtıdy.
Al «Qaldyqtardy basqarý» dep atalatyn besinshi bólimde bıýdjettik uıymdar men turǵyndardan shyqqan qaldyqtardy zalalsyzdandyrý, qatty turmystyq qaldyqtardy kómýge arnalǵan polıgonnyń úshinshi bóligin salý jáne zańsyz qoqys oryndaryn joıý sharalary qarastyrylyp otyr.
Eske salaıyq, buǵan deıin Astanada qaldyqtardy baqylaýdyń tsıfrlyq júıesi alǵash ret engizilgeni jóninde jazǵanbyz.
