Astanada 2026 jyly alǵash ret CMG Media Week 2026 ótedi
ASTANA. KAZINFORM — 2026 jyldyń 13-17 sáýiri aralyǵynda Maqsut Narikbayev University Halyqaralyq jýrnalıstıka mektebinde alǵash ret «CMG Media Week 2026» ótedi.
Baǵdarlama CMG mamandary men MNU sarapshylaryn biryńǵaı bilim berý alańynda biriktiredi: qarqyndy trenıngter, mýltımedııalyq kontentpen jumys isteý boıynsha sheberlik sabaqtary ótip, halyqaralyq ortada reportaj jasaý daǵdylary damytylady. Stýdentter naqty keıstermen jumys isteýge, CMG sarapshylaryna suraqtar qoıýǵa jáne óz jobalaryn ázirleýge múmkindik alady.
Іs-sharanyń qorytyndylary boıynsha eń úzdik jobalar jabylý saltanatynda tanystyrylady, al stýdentterge tıisti sertıfıkattar beriledi.
MNU provosty Anar Ibraevanyń aıtýynsha, «CMG Media Week 2026» — stýdentterdi halyqaralyq deńgeıde jumys isteıtin jetekshi qytaılyq mamandardyń ozyq tájirıbelerimen tanystyrýdyń biregeı múmkindigi. CMG qytaılyq BAQ-tyń flagmany jáne kásibı jýrnalıstik sheberliktiń ortalyǵy retinde tanymal.
CGTN bas redaktorynyń orynbasary Dın ıÝn stýdentterge beıneúndeýinde sóılegen sózinde Astanadaǵy «CMG Media Week 2026» — ıdeıalar men tájirıbe almasýǵa arnalǵan alań ekenin, onda stýdentter tek jańa kásibı daǵdylardy ıgerip qana qoımaı, sonymen qatar qazirgi zamanǵy qytaılyq BAQ-tyń jumysyn jaqsyraq túsinetinin atap ótti.
Bul halyqaralyq is-shara MNU-diń 2023 jyly Halyqaralyq jýrnalıstıka mektebin ashqan Prezıdent Teleradıokeshenimen seriktestigin jalǵastyryp otyr. Birlesken joba Qazaqstanda memleket pen qoǵamnyń qajettilikterine baǵyttalǵan jas jýrnalısterdi daıarlaıtyn alǵashqy joba bolyp, halyqaralyq BAQ yntymaqtastyǵyn odan ári keńeıtýge negiz qalady.
Prezıdent Teleradıokesheni men China Media Group uıymdastyrǵan is-shara Qytaı Halyq Respýblıkasy Tóraǵasynyń Qazaqstanǵa sapary kezinde 2025 jyldyń 16 maýsymynda qol qoıylǵan Memorandým aıasynda ótkizilip jatyr. Qol qoıý rásimi Aqordada eki kóshbasshy Qasym-Jomart Toqaev pen Sı Tszınpınniń qatysýymen ótti.
QR Prezıdentiniń Teleradıokesheni — Qazaqstandaǵy medıa kontentti óndirý men taratýdyń tolyq tsıkly bar eń iri tik biriktirilgen medıakompanııa. QR Prezıdentiniń Teleradıokesheni quramyna Jibek Joly telearnasy jáne qazaqstandyq aýdıtorııaǵa arnalǵan attas radıo, Silk Way, Silk Way Cinema jáne Silk Way Prime halyqaralyq arnalary, Kazinform halyqaralyq aqparat agenttigi, Derekti kıno ortalyǵy jáne TRKLAB dıdjıtal brendi kiredi.
China Media Group (CMG) — álemdegi eń iri jáne bedeldi medıa konglomerattarynyń biri. Kompanııa qurylymyna 100-den astam telearna men radıoarna, aqparattyq portaldar kiredi, olar 80-nen astam tilde aqparat taratady. CMG tilshiler jelisinde 67 eldegi 190-nan astam sheteldik bıýro bar.
Maqsut Narikbayev University (MNU) — Qazaqstandaǵy jetekshi jáne bedeldi joǵary oqý oryndarynyń biri. MNU QAA Global Quality Award bedeldi brıtandyq akkredıttegen TMD men Ortalyq Azııadaǵy alǵashqy ýnıversıtet boldy.