Astanada 2025 jylǵy «Bolashaq oıyndaryna» irikteý bastaldy

ASTANA. KAZINFORM — Astanadaǵy J.Úshkempirov atyndaǵy Jekpe-jek saraıynda «Road to Abu Dhabi» atty irikteý týrnıri bastaldy. 

Bul doda — qazaqstandyq komandalar úshin 2025 jyly ótetin «Bolashaq oıyndaryna» qatysatyn joldaǵy mańyzdy kezeń bolmaq. Halyqaralyq fıdjıtal formattaǵy mýltısporttyq týrnır osy jyldyń jeltoqsan aıynda Abý-Dabı qalasynda ótedi, dep habarlaıdy elorda ákimdiginiń resmı saıty.

— Ótip jatqan týrnır Abý-Dabıdegi Bolashaq oıyndaryna irikteýdiń eń mańyzdy kezeńi. Bıyl jeltoqsan aıynda uıymdastyrylatyn is-sharaǵa Qazaqstannan 3 komanda qatysady. Birinshisi — Qazan qalasynda ótken týrnıriniń fıdjıtal shýter baǵytynyń jeńimpazy, taǵy ekeýi osy týrnırdiń nátıjesinde anyqtalady, — dedi «Bolashaq oıyndary 2026» halyqaralyq kópsalaly fıdjıtal formatyndaǵy týrnırin uıydastyrý jáne ótkiýe dıreksııasynyń basshysy Álibek Hasenov.

Іrikteý týrnıri 21-26 shilde aralyǵynda jalǵasady. Nátıjesinde Qazaqstan atynan Bolashaq oıyndaryna joldama alatyn eki komanda anyqtalady. Jeńimpazdar fıdjıtal fýtbol jáne fıdjıtal basketbol dıstsıplınalary boıynsha irikteledi.

Bul — búkil álemde jyldam damyp kele jatqan sporttyń jańa baǵyty. Fıdjıtal sport — tsıfrlyq (dıdjıtal) jáne fızıkalyq kezeńderdi biriktiretin format.

Aldymen qatysýshylar eki taımnan turatyn kompıýterlik oıynda baq synasady, sodan keıin dál sol eseppen alańǵa shyǵyp, taǵy eki taım oınaıdy. Alǵash bolyp jarys jolyna fýtbol komandalary shyǵady. Abý-Dabıde óner kórsetý quqyǵyn jeńip alatyn fıdjıtal fýtbol chempıony 23 shilde kúni belgili bolady. Alańdaǵy jáne kıberoıyn kezeńindegi erejeler men standarttardyń saqtalýyn Qazaqstan fýtbol federatsııasynyń birinshi sanatty tóreshisi Danat Muhametǵalıev qadaǵalaıdy.

— Bul — naǵyz mını-fýtbol erejesimen ótetin oıyn. Fıdjıtal sportshylarǵa klassıkalyq týrnırlerdegi oıynshylar sııaqty barlyq sheberlik qajet, — dedi Danat Muhametǵalıev.

«Bolashaq oıyndary» fıdjıtal sport tujyrymdamasyndaǵy tuńǵysh halyqaralyq kópsalaly týrnır 2024 jyly Qazan qalasynda ótken bolatyn. Ekinshisi bıyl Abý-Dabıde, al 2026 jyldyń jazynda fıdjıtal sport jarystary Astanada ótetin bolady.

— Biz bul týrnırge eki komandamen keldik, ár oıynshyǵa múmkindik bergimiz keledi. Bizdiń maqsat — tek jeńis. Eki dıstsıplınada da qatysyp, Abý-Dabıdegi 1 mln dollar júlde qoryna talasýǵa daıynbyz. Biz úshin fıdjıtal sport — jaı hobbı emes, kásibı deńgeıde álemdik arenaǵa shyǵýǵa berilgen múmkindik. Buryn bul jigitterdiń bolashaǵy bulyńǵyr edi, endi olarda sporttyq karera qurýǵa úmit paıda boldy. Biz kelesi jyly Astanada ótetin Bolashaq oıyndaryna da daıyndalyp jatyrmyz. Qazaqstannyń Ortalyq Azııada fıdjıtal sportty damytý ortalyǵyna aınalý múmkindigi zor dep senemiz, — dedi UEL Team komandasynyń ókili Evgenıı Nabıýllın.

Aıta keteıik, fıdjıtal fýtbol jarysy aıaqtalǵannan keıin týrnır fıdjıtal basketbol dıstsıplınasymen jalǵasady. Bul sport túri boıynsha jeńimpaz senbi kúni, 26 shildede ótetin fınaldyq matchta anyqtalady.

Kórermenderge kirý tegin. Saǵat 10:00–de bastalady. 

Aıta ketelik 1,5 mln-nan asa qazaqstandyq belsendi túrde kıbersportpen aınalysady.