Astanada 2020 jylǵa deıin 228 apatty úı súriledi - I.Tasmaǵambetov
ASTANA. 27 jeltoqsan. QazAqparat - Elordada 2020 jylǵa deıin 228 apatty úı súriledi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Astana qalasynyń ákimi Imanǵalı Tasmaǵambetov aıtty.
Qala basshysynyń atap ótýinshe, Astananyń turǵyn úı qoryn jańartý adamdardyń ómirine qaýip tóndiretin eske úılerdi joıýmen qatar júrgizilýi tıis. Qazirgi ýaqytta apatty úılerdi joıý baǵdarlamalyq deńgeıde qolǵa alynǵan ári alǵashqy nátıjeler de bar.
«Osy baǵdarlama aıasynda 2017 jylǵa deıin apatty jaǵdaıda turǵan 228 úı súrilip, turǵyndarǵa jańa úılerden páter alatyn bolady. Apatty jaǵdaıdaǵy buzylatyn úılerdiń jalpy aýdany shamamen 150 myń sharshy metrdi quraıdy. Bul rette apatty úılerdiń ıeleri 3 519 otbasyn jańa baspanamen qamtamasyz etý qajet», - dedi ol.
I.Tasmaǵambetovtiń aıtýynsha, ol mynadaı tetikter arqyly júzege asyrylady: úı ıesine turyp jatqan adamdardyń sanyna qaramastan buzylatyn baspanaǵa balama sharshy metrlik páter usynylady. Biraq bul úılerdiń naryqtyq quny apatty jaǵdaıdaǵy úılerdiń baǵasymen teń bolmaıdy. «Budan ary páterlerdiń 70 paıyzy naryqtyq baǵamen satylady. Bul birinshiden, bıýdjetke jumsalǵan qarjyny qaıtarýǵa, ekinshiden, túsken kiristi baǵdarlamany jalǵastyrýǵa múmkindik beredi», - dedi elorda ákimi.
