Astanada 2015 jylǵa deıin «aqyldy» elektr esepteýish quraldary engiziledi
ASTANA. 27 qyrkúıek. QazAqparat - Astanada elektr energııasyn esepteý jáne avtomattandyrý jobasy aıasynda 2015 jylǵa deıin elordanyń jeke sektor abonentterine «aqyldy» elektr esepteýish quraldary engiziledi.
Bul týraly búgin QR Tabıǵı monopolııalardy retteý agenttiginiń Astana qalasy boıynsha departamentiniń bastamasymen ótkizilgen baspasóz-týry barysynda kompanııanyń basqarma tóraǵasynyń orynbasary Janat Mashkenov málim etti.
«Bul «aqyldy» elektr esepteýish quraly bolyp tabylady. Qurylǵylardy qalanyń barlyq jeke sektoryna 2015 jylǵa deıin tolyq engizý josparlanýda», - dep atap ótti.
Onyń sózine qaraǵanda, esepteýish qurylǵylaryn jetkizý jaqyn arada tender ótkizilgennen keıin bastalady. Joba Astanada 3 jyl júzege aspaq. «Bul eń aldymen qarjylandyrýǵa baılanysty bolmaq. Osy ýaqyt aralyǵynda 10 myń esepteýish ornatý kózdelýde. Halyq tek tutynǵan elektr energııasy úshin qarajat tóleýi tıis ekendigin túsinýi tıis», - deıdi ol.
Aıta keteıik, «Astana-AEK» AQ negizgi qyzmeti Astana qalasynyń tutynýshylaryna elektr energııasyn berý jáne taratý bolyp tabylady.
