Astanada 2015 jyldan beri salmonellez anyqtalǵan 98 tonna qus eti joıyldy - AShM

 ASTANA. QazAqparat -  Astananyń azyq-túlik qaýipsizdigin qamtamasyz etý maqsatynda Aýyl sharýashylyǵy mınıstrligi Veterınarlyq baqylaý jáne qadaǵalaý komıtetiniń Veterınarlyq ınspektorlary saýda oryndarynda sapasyz mal jáne qus sharýashylyǵy ónimderiniń enýine qarsy sharalardy qolǵa alyp keledi. Atap aıtqanda, jergilikti atqarýshy organdar bazarlardy, dúkenderdi, saýda jelilerin, veterınarlyq ónimdi saqtaý jáne satý ortalyqtary men núktelerin qadaǵalap keledi. Bul týraly QR Aýyl sharýashylyǵy mınıstrliginiń baspasóz qyzmetinen habarlandy.

Astanada jalpy aýyl sharýashylyǵy ónimderin satatyn 14 bazar bar. Onyń barlyǵynda veterınarlyq dárigerler jumys istep, veterınarlyq qujattardyń sáıkestigin, et jáne sút ónimderiniń sapasyn tekseredi. «Jyl basynan beri júrgizilgen tekserýler qorytyndysy boıynsha veterınar ınspektorlar 3 mln. teńgeden astam somaǵy 70 aıyppul salǵan. Negizgi buzýshylyqtar ilespe veterınarlyq qujattardyń bolmaýyna, baqylanatyn taýarlardy tasymaldaý barysynda veterınarlyq-sanıtarlyq erejeler men talaptardyń saqtalmaýyna qatysty bolyp otyr», - delingen baspasóz baıanynda.

Málimetterge qaraǵanda, 2015 jyldan beri zerthanalyq tekserýler negizinde salmonellez aýrýyn juqtyrǵan 98 tonna qus eti joıylǵan. «Nurdáýlet», «Ortalyq bazar», «Álem» saýda ortalyqtarynan tıisti qujattary joq 60 keliden astam qus eti tárkilengen. Al Polsha men Germanııadan jetkizilgen sıyr etinen jasalǵan ónimderdiń 32666,46 tonnasynan lısterııa monotsıtogenes pen ishek taıaqsha bakterııalary anyqtaldy.

«Búgingi kúni ishki saýdanyń barlyq nysandary kompıýterlik tehnıkamen jáne ınternetpen jaraqtandyrylǵan. Qajetti aqparattar men málimetter bazasyna qoljetimdi», - delingen baspasóz baıanynda.