Astanada 2014 jyldyń 1 qańtarynan bastap elektr qýatynyń tarıfi 8,29 paıyzǵa qymbattady
ASTANA. 9 qańtar. QazAqparat - QR Tabıǵı monopolııalardy retteý agenttiginiń Astana qalasy boıynsha departamenti «Astanaenergosbyt» JShS elektr qýatymen qamtý tarıfiniń ortasha deńgeıin QQS-syz 12,67 teńge/kVtsaǵ kóleminde belgiledi. 1 qańtarǵa deıin elordada elektr qýatynyń ortasha tarıfi QQS-syz 11,7 teńge/kVtsaǵ bolǵan. Bul týraly astana.kz saıtyna Astana qalasy ákimi apparatynyń Ómirdi qamtý jáne ınfraqurylymdy damytý bóliminen habarlady.
Tarıftiń kóterilýine 2014 jylǵy 1 qańtardan bastap Astana qalasynyń energııa óndirýshi uıymynyń taratý baǵasyn orta eseppen 15,3% ulǵaıtýy, sondaı-aq, elektr energııasynyń syrtqy tasymaldaýshylarynyń tarıfteriniń 6,9% artýy sebep boldy.
Budan bylaı, elektr energııasyn taratýdyń ortasha quny:
- halyq úshin - QQS-syz 10,57 teńge/kVtsaǵ;
- basqa tutynýshylar úshin - QQS-syz 13,64 teńge/kVtsaǵatty quraıdy.
Elektr energııasynyń ortasha deńgeıine qaraǵanda, QR TMRA Astana qalasy boıynsha departamenti táýlik zonalary men tutyný kólemi boıynsha elektr energııasynyń saralanǵan tarıfterin belgiledi.
Saralanǵan tarıfterdi esepteý kezinde tutynýshylardyń elektr qýatyn únemdeýi men ótken jylmen salystyrǵanda tutyný kólemin azaıtýdyń esebinen mınımaldy tarıf tómendedi.
Nátıjesinde, elektr plıtasyn qoldanbaıtyn halyq úshin tutyný kólemi boıynsha mınımaldy tarıf 70 kVt-ǵa deıin 4,86 paıyzdy, al elektr plıtalaryn qoldanatyndar úshin tutyný kólemi 90 kVt-ǵa deıingi turǵyndar úshin 3,93 paıyzǵa deıin kemidi. Sonymen qatar, elektr plıtalar qoldanatyn ózge tutynýshylar úshin tutyný kólemi boıynsha 90 kVt-ǵa deıingi tarıf 12,47 paıyzǵa deıin azaıdy.
