Astanada 2008-2010 jyldarǵa arnalǵan Memlekettik turǵyn úı baǵdarlamasy boıynsha qujattardy qabyldaý 2011 jyldyń basynda bastalady - I.Tasmaǵambetov
ASTANA. 21 jeltoqsan. QazAqparat /Gúlmıra Álıakparova/ - Keler jyldyń basynda Astanada 2008-2010 jyldarǵa arnalǵan Memlekettik turǵyn úı baǵdarlamasy aıasynda azamattardan qujattardy qabyldaý bastalady.
Bul týraly óziniń jeke blogynda turǵyndardyń saýaldaryna jaýap bergen qala ákimi Imanǵalı Tasmaǵambetov aıtty.
«QR Úkimeti 2011 jáne odan keıingi jyldarǵa arnalǵan Memlekettik turǵyn úı baǵdarlamasyn jarııalaý týraly sheshim qabyldaǵan joq. Biraq keler jyldyń basynda 2008-2010 jyldarǵa arnalǵan Memlekettik turǵyn úı baǵdarlamasy aıasynda úmitkerlerden qujattardy qabyldaýdy bastaımyz», - dedi ákim.
Qala basshysy atap kórsetkendeı, qujattardy qabyldaý bastalǵandyǵy týraly habarlama qalalyq gazetter men Astana ákimdiginiń resmı saıtynda ornalastyrylatyn bolady.
Eske salaıyq, 2009 jyldyń 28 qańtary men 27 naýryzy aralyǵynda 2008-2010 jyldarǵa arnalǵan Memlekettik turǵyn úı baǵdarlamasynyń birinshi kezegi boıynsha qujattardy qabyldaý júrgizilip, azamattardan barlyǵy 25 347 ótinish qabyldandy. Baǵdarlamanyń birinshi kezegine qatysýshylarǵa Tilendıev dańǵylynyń boıynda barlyǵy 5612 páterge eseptelgen 20-dan astam kópqabatty úıler salynýda. Onyń 3175-i - bir bólmeli, 1811 - eki jáne 626 - úsh bólmeli páterler.
