Astanada 2005-2007 jyldarǵy turǵyn úı baǵdarlamasy aıasynda salyna bastaǵan №5-shi turǵyn úı kesheni jyl sońynda beriledi
ASTANA. Shildeniń 28-i. QazAqparat /Gúlmıra Álıakparova/ - 2005-2007 jyldarǵa arnalǵan Memlekettik turǵyn úı baǵdarlamasy boıynsha Astana qalasynda salyna bastap,
qurylysy osy kúnge deıin aıaqtalmaǵan №5-shi turǵyn úı kesheni 2010 jyldyń jeltoqsanynda paıdalanýǵa beriledi. Bul týraly óziniń jeke blogynda qala turǵyndarynyń suraqtaryna jaýap bergen Astana ákimi Imanǵalı Tasmaǵambetov málim etti.
«2005-2007 jyldarǵa arnalǵan Memlekettik turǵyn úı baǵdarlamasy boıynsha búgingi kúni jalpy aýmaǵy 11,167 sharshy metr bolatyn Ońtústik-Shyǵys shaǵynaýdanyndaǵy № 1-shi jáne 2-shi turǵyn úılerdiń qurylystary aıaqtaldy (páterlerdiń jalpy sany - 194). Osy turǵyn úı keshenniń 3-shi kezegin aǵymdaǵy jyldyń sońyna deıin berý josparlanýda», - delingen I.Tasmaǵambetovtyń jaýabynda.
Sondaı-aq ákim, 2010 jyldyń jeltoqsanynda №5-shi turǵyn úı kesheni de (640 páter) salynyp bitiriletinin aıtty.
«Qazirgi ýaqytta atalmysh nysanyń qabyrǵalary qalanýda, kárizdik júıeler, jeldetkish shahtalar men terezeler ornatylýda. Nysannyń ýaqytynda iske qosylýyna Astana qalasynyń Qurylys basqarmasy qadaǵalaý júrgizýde», - deıdi ol.
Aıta keteıik, 2005-2007 jyldarǵy turǵyn úı baǵdarlamasynda komıssııanyń oń sheshimin 3326 adam alyp, 2010 jyldyń qańtaryna deıin olardyń tek 1738-i ǵana tıisti baspanalaryna qol jetkizgen bolatyn. Qalǵan 1588-diń bir bóligi qurylysy sottyń aralasýymen aıaqtalǵan №6-shy turǵyn úı kesheninen birneshe aı buryn aldy.
Sondaı-aq qala basshysynyń sózine qaraǵanda, 2008-2010 jyldarǵa arnalǵan Memlekettik turǵyn úı baǵdarlamasynyń qatysýshylary ústimizdegi jyldyń sońyna deıin baspanamen tolyq qamtamasyz etiletin bolady. Óz sanattary boıynsha anaǵurlym joǵary ball jınaǵan Memlekettik baǵdarlamanyń qatysýshylaryna páter kiltteri birinshi kezekte beriledi.
2008-2010 jyldarǵa arnalǵan baǵdarlama boıynsha qalada N.Tilendıev dańǵylynyń ońtústik bóliginde jalpy aýmaǵy 247,6 myń sharshy metr bolatyn 5612 páterlik turǵyn úı keshenderiniń qurylystary júrgizilip jatyr, qatysýshylardyń sany - 5612.
