Astanada 2000 oqýshy bir mezette «Altyn uıa» kúıin oryndady
ASTANA. KAZINFORM — Astanada EXPO halyqaralyq kórme ortalyǵy alańynda «Qazaqstan – bizdiń ortaq úıimiz» taqyrybynda aýqymdy mýzykalyq fleshmob ótti.
Іs-sharaǵa qala mektepterinen 2000-ǵa jýyq oqýshylar qatysyp, olar bir mezette kúıshi-kompozıtor Qarshyǵa Ahmedııarovtyń «Altyn uıa» kúıin oryndady.
Oqýshylar dombyra, qobyz, qylqobyz, jetigen, sazsyrnaı, fleıta jáne skrıpka sekildi ulttyq jáne klassıkalyq aspaptarda oınady.
Mýzykalyq fleshmobqa elordadaǵy óner jáne mýzykalyq mektepterdiń, sondaı-aq jalpy bilim berý uıymdarynyń 10-16 jas aralyǵyndaǵy tárbıelenýshileri qatysty.
Uıymdastyrýshylardyń aıtýynsha, is-sharanyń basty maqsaty – «Qazaqstan – bizdiń ortaq úıimiz» ıdeıasyn mýzyka arqyly jetkizý. Ártúrli aspaptyń úni bir arnaǵa toǵysyp, kópultty eldiń birligin beıneledi.
Fleshmobqa qatysqan oqýshylar da óz áserlerimen bólisti. Olardyń aıtýynsha, «Altyn uıa» kúıin oryndaý týǵan jerge degen súıispenshilikti sezinýge múmkindik bergen.
Aıta keteıik, «Altyn uıa» kúıi Otanǵa, týǵan jerge degen saǵynysh pen mahabbatty beıneleıtin týyndy sanalady.