Astanada 200-ge jýyq adam óndiristik nysandarda qaýipsizdik normalaryn buzǵany úshin jazalandy
ASTANA. 13 qańtar. QazAqparat - 2013 jyly elordada 4 myńǵa jýyq qaýipti óndiristik nysan tekserilip, birqatar qaýipsizdik erejeleri men normalaryn buzý oqıǵalary tirkeldi.
Bul týraly astana.kz saıtyna qalalyq TJD habarlady.
«2013 jyly táýekelderdiń dárejesine sáıkes 196 kásiporynda 3718 qaýipti óndiristik nysan tekserilip, 2316 erejeler men qaýipsizdik normalaryn buzý oqıǵasy anyqtalyp, olardy joıý boıynsha uıǵarymdar berildi. Buzýshylyq joıylǵansha 12 nysannyń jumysy toqtatyldy. 189 adam jaýapkershilikke tartyldy», - dep habarlady qalalyq Tótenshe jaǵdaılar departamentiniń bastyǵy Meıram Ysqaqov.
Vedomstvonyń habarlaýynsha, Astana qalasy garnızonynda kúrdeli órtterdi sóndirý barysynda sapaly jumysty qamtamasyz etý úshin adamdar kóptep jınalatyn, sondaı-aq, kúrdeli konstrýktıvti jobalanǵan nysandarǵa arnalǵan órt sóndirýdiń 584 jedel jospary men 533 jedel kartochkasy bar.
Budan basqa, shaqyrýdyń joǵary dárejesinde órtter men basqa da tótenshe jaǵdaılar kezinde áreket etýge daıyndyqty arttyrý maqsatynda ómirdi qamtý jáne adamdar kóptep jınalatyn nysandarda 14 josparly jáne 4 jospardan tys jalpy garnızondyq órt sóndirý - taktıkalyq jattyǵýlar uıymdastyryldy, sonyń ishinde eki jaǵdaıda tikushaq tartyldy.
