Astanada 200-ge jýyq adam Esil jaǵalaýyn tazartýǵa shyqty
ASTANA. KAZINFORM – Elordada «Taza Qazaqstan» aýqymdy ekologııalyq bastamasy aıasynda Esil ózeniniń jaǵalaýyn tazartý aktsııasy ótti. Oǵan «Astana jastary» jastar resýrstyq ortalyǵynyń eriktileri, belsendi turǵyndar jáne Saryarqa men Nura aýdandary ákimdikteriniń ókilderi qatysty, dep habarlaıdy qala ákimdiginiń resmı saıty.
Aýqymdy is-sharaǵa shamamen 200 adam jınaldy.
Qatysýshylar jaǵalaý aýmaǵyn qoqystan tazalap, ásirese qys mezgilinen keıin qaldyqtar kóp jınalǵan ýchaskelerge erekshe kóńil bóldi.
Aktsııanyń maqsaty – qala turǵyndary arasynda ekologııalyq mádenıetti qalyptastyrý jáne qorshaǵan ortany qorǵaý máselelerine nazar aýdarý.
– Búgin 50-den astam erikti jınaldyq. Biz úshin qalanyń ekologııasyna úles qosý mańyzdy.«Taza Qazaqstan» aktsııasyn árdaıym qoldaımyz. Tazalyq – árqaısymyzdan bastalady. Osyndaı bastamalar úlken qozǵalysqa aınalyp, jastardy kóbirek tartýǵa múmkindik beredi, - dedi «Astana jastary» ortalyǵynyń eriktisi Qaırat Qulhojaqymet.
Ekobelsendi Elmıra Isabaeva da birneshe jyldan beri qala aýmaǵyn óz betinshe tazalap, áleýmettik jeliler arqyly ekologııalyq ómir saltyn nasıhattap keledi. Bul joly da ol Esil jaǵalaýyn tazalaýǵa atsalysty.
– Úsh jyldan beri tazalyq aktsııalaryna qatysyp, adamdardy shaqyryp kelemin. Buryn qatysýshylar az bolatyn, al búgin osynsha adamnyń jınalǵanyn kórip qýandym. Tabıǵatymyz óte ádemi, ony saqtaýymyz kerek. Mundaı aktsııalar jıi ótip, oǵan qatysýshylar sany arta beredi dep senemin, - dedi ol.
Qatysýshylar mundaı ekologııalyq sharalar aldaǵy ýaqytta qalanyń ózge de aýmaqtarynda jalǵasatynyn atap ótti. Eriktiler men belsendiler turǵyndardy beıjaı qalmaı, qala tazalyǵyna óz úlesin qosýǵa shaqyrady.
Eske sala keteıik, buǵan deıin elordada birneshe kósheniń qıylysy jóndeý jumysyna baılanysty ýaqytsha jabylatynyn jazǵan edik.
