Astanada 200-den asa sarbaz Otanǵa adal bolýǵa ant berdi
ASTANA. KAZINFORM — «Otan qorǵaýshylar» alańynda astanalyq 68665 áskerı bólimi jas sarbazdarynyń áskerı ant qabyldaý rásimi ótti, dep habarlaıdy Qorǵanys mınıstrliginiń baspasóz qyzmeti.
Saltanatty sátke kýá bolý jáne sarbazdardy qoldaý úshin Qurlyq áskerleriniń basshylyǵy, qurmetti qonaqtar, Qarýly kúshterdiń ardagerleri, astanalyq qorǵanys isteri jónindegi departamentiniń ókilderi jáne jas sarbazdardyń týǵan-týystary keldi.
Dástúr boıynsha «Otan Ana» monýmentine gúl shoqtary qoıylyp, qatysýshylar qazaq sarbazdarynyń erligin bir mınýt únsizdikpen eske aldy.
Saltanatty sharada ásker qataryna endi qosylǵan jas órenderdi Qurlyq áskerleri bas shtabynyń bastyǵy — bas qolbasshynyń birinshi orynbasary general-maıor Qýanyshbek Úshtaev quttyqtady.
— Búgingi kún sender úshin de, búkil memleket úshin erekshe kún. Sender Otan aldynda ant berip, halqymyzdyń tynyshtyǵy men qaýipsizdigin qorǵaýǵa úlken qadam jasadyńdar. Ant — jaı sóz emes, bul árbir er azamattyń ómirlik prıntsıpi, abyroıy men qadir-qasıeti. Qyzmet senderge berik tárbıe jáne bolashaq jetistikterdiń bastaýy bolady dep senemin, — dedi ol.
Aıta keteıik, jas sarbazdar astanalyq brıgadaǵa elimizdiń ártúrli óńirinen kelgen. Solardyń biri — Túrkistan oblysynan kelgen Ernur Dosymhan — áskerge óz erkimen shaqyrylǵanyn aıtty.
— Men kópbalaly otbasynda óskenmin. On úsh baýyrym bar. Árıne, olardy saǵyndym, degenmen áskerı tájirıbe meniń bolashaq ómirimde qajet bolady dep bilemin. Men úlken otbasyma tirek bolýym kerek. Biz ant qabyldaýǵa barynsha daıyndaldyq. Jas jaýynger kýrsynda kóp nárse úırendim jáne áskerdiń tynys-tirshiligine etim úırenip qaldy, — dedi ol.
Sonymen qatar saltanatty sharada 68665 áskerı bólimniń eki ofıtserine — kapıtan Suńǵat Qabdyrovqa jáne aǵa leıtenant Ernar Kenjebaıǵa Qarýly kúshterdiń ardageri general-maıor Álıhan Jarbolov mereıtoıly medalin tapsyrdy.
Ant qabyldaǵannan keıin sarbazdar alań arqyly saltanatty marsh jasap ótti. Sodan keıin olar áskerı-patrıottyq ánderdi oryndady. Іs-shara qoıan-qoltyq urys elementteriniń kórsetilimi jáne qurmet qaraýyl rotasynyń áskerı defıle kórsetýimen aıaqtaldy.
Budan buryn Almatyda 160-tan astam kýrsant ant bergenin jazǵanbyz.