Astanada №20 okrýg boıynsha qalalyq máslıhatqa depýtat saılaýy ótti
ASTANA. QazAqparat - Astanada 26 naýryz kúni «Almaty» aýdanynyń №20 saılaý okrýginde elorda máslıhatyna depýtat saılaýy ótti. Halyqtyń daýys berýi nátıjesinde saılaý komıssııasy «Nur Otan» partııasynyń múshesi Qaıyrly Taýkendi depýtat etip tirkedi.
43 jasar Qaıyrly Taýken «Nur» kompanııalar toby dırektorlar keńesiniń tóraǵasy bolyp tabylady. Onyń kandıdatýrasyn saılaýshylardyń basym bóligi qoldady, dep habarlaıdy astana.kz.
Atap óterligi, qalalyq máslıhatqa taǵy eki kandıdat - J. Qumarbekov jáne A. Shıshkın úmitker boldy. Saılaýshylar tizimine 17 093 adam engizildi, daýys berýge 8 588 saılaýshy, nemese saılaýshylar tizimine engizilgen azamattardyń 50,2% qatysty. Qaıyrly Taýken úshin saılaýshylardyń 86,4% daýys bergen.
Saılaý ótken kúni okrýgte jeti saılaý ýchaskesi jumys istedi. Saılaý komıssııasynyń aqparatyna sáıkes, daýystardy esepteý barysynda 25 bıýlleten jaramsyz dep tanyldy.
Saılaý ashyq jáne móldir formatta ótti, dep málimdedi saılaý komıssııasy.
Daýys berýdiń qorytyndysy boıynsha qalalyq saılaý komıssııasy «Nur Otan» partııasynyń múshesi Taýken Qaıyrly Kenesbekulyn Astana qalasy máslıhatynyń depýtaty etip tirkedi.
