Astanada 20 myńnan astam jaıaý júrginshi jol erejesin buzǵan
ASTANA. KAZINFORM — Elordada jaıaý júrginshiler qaýipsizdigine baqylaý kúsheıtildi. Qazir Astanada 19 jaıaý júrginshiler ótkelinde kamera jumys istep tur, dep habarlaıdy Іshki ister mınıstrliginiń baspasóz qyzmeti.
«Zań men tártip» tujyrymdamasy aıasynda elordada polıtseıler jol qozǵalysyna qatysýshylardyń, onyń ishinde jaıaý júrginshilerdiń jol qozǵalysy erejelerin buzýynyń aldyn alý boıynsha júıeli jumystar júrgizip keledi.
Jol-kólik oqıǵalarynyń sanyn azaıtý jáne jaıaý júrginshilerdiń qaýipsizdigin arttyrý maqsatynda turaqty túrde reıdter men jergilikti profılaktıkalyq is-sharalar uıymdastyrylady.
— Іs-sharalar barysynda qaladaǵy adam kóp júretin jaıaý júrginshiler ótkelderinde reıdter ótkiziledi. Negizgi nazar túsindirý jumystaryna, quqyq buzýshylyqtardyń aldyn alýǵa jáne joldaǵy qaýipsiz minez-qulyq mádenıetin qalyptastyrýǵa aýdarylady. Jyl basynan beri jaıaý júrginshiler joldyń júrý bóligin belgilenbegen jerden kesip ótkeni úshin 20 myńnan astam ret ákimshilik jaýapkershilikke tartyldy, — deıdi polıtsııa qyzmetkerleri.
Barlyq quqyq buzýshymen profılaktıkalyq áńgimeler júrgizilip, jol qozǵalysy erejelerin saqtaýdyń mańyzy túsindirildi.
Elordadaǵy 19 jaıaý júrginshiler ótkelinde jaıaý júrginshilerge jol bermeý faktilerin avtomatty túrde tirkeıtin kameralar júıesi iske qosylǵan. Quqyq buzýshylyq anyqtalǵan jaǵdaıda aqparat avtomatty túrde tirkelip, kólik júrgizýshisi zańnamada belgilengen tártippen ákimshilik jaýapqa tartylady.
Polıtsııa azamattarǵa joldy tek belgilengen oryndardan, baǵdarshamnyń ruqsat beretin sıgnalyna ótip, jol qozǵalysy erejelerin qatań saqtaýdy eskertedi. Sebebi joldaǵy tártip pen saqtyq — barlyq qozǵalys qatysýshylarynyń ómiri men qaýipsizdiginiń basty kepili.
Buǵan deıin Qyzylordada 7 myńdaı jaıaý júrginshi jol erejesin buzǵany anyqtaldy.
