Astanada 20 qyrkúıekten bastap aýyl sharýashylyǵy jármeńkeleri ótkiziledi
ASTANA. QazAqparat - Elordada 20 qyrkúıekten bastap, demalys kúnderi el aımaqtarynyń dástúrli aýyl sharýashylyq jármeńkeleri uıymdastyrylady. Bul týraly Astana qalasy ákimi apparatynyń baspasóz qyzmetine Kásipkerlik jáne ónerkásip basqarmasynan habarlady.
20-21 qyrkúıek kúni Astanaǵa óz ónimderin usyný úshin Almaty oblysynyń aýyl sharýashylyǵy ónimderin óndirýshiler keledi. Barlyq ónim túrleri Astana qalasynyń bazarlarynda qalyptasqan baǵadan áldeqaıda arzan baǵada satylatyn bolady.
Almaty oblysynyń jármeńkesinde jemis-jıdek, et jáne sút ónimderin arzan baǵaǵa satyp alýǵa bolady.
Atap ótý kerek, Astanada aımaqtardyń aýyl sharýashylyq jármeńkeleri osymen 5 jyl ótkizilip keledi.
Esterińizge sala keteıik, byltyrǵy jyly Astanada uıymdastyrylǵan jármeńkede Almaty oblysynyń ókilderi 400 tonnadan astam ónim usynǵan bolatyn. Sol jyly olar tamaq ónimderiniń 24 túrin, atap aıtqanda 193 tonna kókónis, 110 tonna pııaz, 50 tonnadan astam alma, 17 tonnaǵa jýyq kúrish, 7 tonnadaı balyq, 3 tonna bal, sondaı-aq 60 tonnadan astam et jáne t.b. kóptegen ónim túrlerin ákelgen bolatyn.
Qyzǵan saýda, keremet mádenı baǵdarlama jáne erekshe merekelik kóńil kúı atalǵan aýyl sharýashylyq jármeńkeleriniń ajyramas bóligine aınalǵan. Bul jerde azyq-túlikten basqa qolóner sheberleriniń qolynan shyqqan ásem týyndylar da saýdanyń negizgi bóligi ekenin aıta ketý kerek. Al elimizdiń oblystarynyń úzdik shyǵarmashylyq ujymdary men óner sheberleriniń gala-kontsertteri jármeńkeniń kórkin qyzdyratyn myzǵymas dástúrge aınaldy.
