Astanada 20-21 tamyz kúnderi qazaqstandyq óndirýshilerdiń mektep jármeńkesi ótkiziledi
ASTANA. QazAqparat - Jetinshi ret ótkiziletin jyl saıynǵy «Mektepke jol» respýblıkalyq aktsııa aıasynda 20-21 tamyz kúnderi saǵat 10.00-da Astana qalasy ákimdiginiń aldyndaǵy ortalyq alańda mektep jármeńkesi ótedi.
Qalalyq bilim basqarmasynyń habarlaýynsha, sharaǵa Astana, Almaty, Qaraǵandy, Shymkent qalalarynyń kásipkerleri jáne taýar óndirýshileri qatysady.
Jármeńke barysynda qala turǵyndary men qonaqtaryna oqýlyqtardyń, mektep formalarynyń, sporttyq kıimder men aıaq kıimderdiń, keńse taýarlarynyń túr-túri usynylady. Taýar 10%-dan bastap 50%-ǵa deıin jeńildikpen satylady.
Qalalyq alańdaǵy jármeńke kezinde kontserttik baǵdarlama uıymdastyrylady. Oqýshylar saraıynyń, mýzyka men óner mektepteriniń tárbıelenýshileri óz ónerlerin ortaǵa salady.
Sonymen qatar, jármeńke barysynda halyqqa konsýltatsııalyq kómek kórsetý úshin qoǵamdyq qabyldaý qyzmet etedi.
