Astanada 2 jasar balanyń qutqarylýy: Mektep oqýshysy marapattaldy
ASTANA. QazAqparat - Astanalyq 6-synyp oqýshysy Ksenııa Gavrılovaǵa Tótenshe jaǵdaılar departamentiniń bastyǵy, azamattyq qorǵaý polkovnıgi Barat Duzaqbaevtyń atynan alǵys hat tapsyryldy, dep habarlandy Astana qalasy ákimdiginiń resmı saıtynda.
Alǵys hatty tabystaý sharasy «Stolıchnyı bilim berý ortalyǵy» orta mektebiniń oqýshylary men oqytýshylar quramynyń qatysýymen «Jastar» saraıynda ótti. Ony Astana qalasy TJD Tótenshe jaǵdaılardy joıý bóliminiń bastyǵy, azamattyq qorǵaý podpolkovnıgi Eldor Raımbekov tabystady.
«Sýǵa qulaǵan 2 jasar balany qutqarý kezinde qaısarlyǵy men qyraǵylyǵy, batyldyǵy úshin Astana qalasy Tótenshe jaǵdaılar departamenti bastyǵynyń atynan alǵys bildirýge ruqsat etińizder. Balǵyn jasyńyzǵa qaramastan sasqalaqtamaı, der kezinde qaıǵyly jaǵdaıdyń aldyn aldyńyz. Tótenshe jaǵdaılar kezinde kómekke kelip, qol ushyn sozatyn mundaı jas urpaqtyń ósip kele jatqanyna biz óte qýanyshtymyz jáne maqtan tutamyz», - dedi Eldor Raımbekov.
Esterińizge sala keteıik, 2018 jylǵy 17 sáýirde Ksenııa Gavrılova sýǵa qulap túsken kishkentaı balany kórip, úlkenderge der kezinde habarlap, qutqarýshylar balany aman alyp qalǵan bolatyn.
