Astanada 2 avtobýs soqtyǵysyp, oqýshylar zardap shekti
ASTANA. QazAqparat - Elordada búgin Saryarqa jáne Seıfýllın kósheleriniń qıylysynda №102 jáne №46 avtobýstary soqtyǵysyp, boıjetken men tórt oqýshy zardap shekti, dep habarlaıdy QazAqparat tilshisi.
Budan buryn áleýmettik jelide Astanada avtobýstardyń qatysýymen jol-kólik oqıǵasyna kýá bolǵan adamnyń vıdeojazasy jarııalanǵan edi. «Astana LRT» JShS baspasóz qyzmeti atalǵan jol-kólik oqıǵasynyń búgin tirkelgenin rastady.
«Oqıǵaǵa kináli - №102 avtobýstyń júrgizýshisi. Ol qaptal turǵysynan aralyqty saqtamaýynyń sebebinen №46 avtobýspen soqtyǵysqan. Atalǵan oqıǵa boıynsha №102 avtobýstyń júrgizýshisine qatysty hattama toltyrdy. Júrgizýshi protsessýaldyq sheshim qabyldaǵansha jumystan shettetildi. Keıin ol «Qara tizimge» enetin bolady. Bul degenińiz ol aldaǵy ýaqytta qoǵamdyq kólik salasynda jumys isteı almaıtynyn bildiredi», - dep habarlady «Astana LRT» JShS-dan.
Kompanııanyń habarlaýynsha, protsessýaldyq sheshim shyqqansha №46 avtobýstyń da júrgizýshisi jumystan shettetilgen.
Avtobýspen bolǵan jol apatynan bir boıjetken men tórt oqýshynyń zardap shekkeni belgili boldy.
«Balalar №2 qalalyq aýrýhanaǵa jeńil jaraqatpen jetkizildi. Ol jerde balalardy neırohırýrg pen travmatolog qarady. Statsıonarǵa jatqyzý qajettiligi týyndaǵan joq. Sondyqtan balalar travmotologtyń baqylaýymen turǵylyqty jeri boıynsha ambýlatorııalyq emdelýge jiberildi. Boıjetkendi dárigerler qaraǵannan keıin, úıine jiberdi», - dep habarlady Astana qalalyq qoǵamdyq densaýlyq saqtaý basqarmasynyń baspasóz qyzmetinen.
