Astanada 2 800-den astam jol jumysshysy qar tazalaýǵa shyqty
ASTANA. KAZINFORM – Astanada qar tazalaý jumysy úzdiksiz júrgizilip jatyr. Qalanyń kommýnaldyq qyzmetteri táýlik boıy kúsheıtilgen rejımde jumys isteıdi. Kún saıyn myńdaǵan tekshe metr qar qala aýmaǵynan shyǵarylady, dep habarlaıdy elorda ákimdiginiń resmı saıty.
7 qarashaǵa qaraǵan túni kommýnaldyq qyzmetter arnaıy polıgondarǵa 1 073 reıspen 13 310 tekshe metr qar shyǵardy.
7 qarashanyń tańynan bastap qar tazalaý jumysyna 2 844 jol jumysshysy men 1 337 arnaıy tehnıka jumyldyryldy.
Qys maýsymy bastalǵaly beri elordadan 26 myń tekshe metrden astam qar, ıaǵnı 2 122 júk kóligi kólemindegi qar shyǵaryldy.
Qar kúreý jumysynda aldymen qalanyń negizgi kósheleri men qoǵamdyq kólik marshrýttary júretin joldarǵa nazar aýdarylady. Osydan keıin ortasha qozǵalys aımaqtarynda – aýlalarda, alańdarda, trotýarlar men aıaldamalarda tazalaý júrgiziledi.
Astana ákimdigi qala turǵyndary men qonaqtaryn qaýipsizdik erejelerin saqtaýǵa, joldar men jaıaý júrginshiler joldarynda barynsha muqııat bolýǵa, sondaı-aq qolaısyz aýa raıy jaǵdaıynda alys saparlarǵa shyqpaýǵa shaqyrady.
Aıta keteıik, Astanadan eki kúnde 3000 tekshe metrden astam qar arnaıy polıgondarǵa shyǵaryldy.