Astanada 2 600-den astam jarnamalyq banner alynyp tastaldy
ASTANA. QazAqparat - Elordada qalanyń jalpy kelbetin 2019 jyly bekitilgen dızaın-kodqa sáıkes keltirý jumysy júrip jatyr. Kún saıyn aýdandarda kásipkerler arasynda túsiniktemeler júrgiziledi, dep habarlaıdy Astana ákimdiginiń resmı saıty.
Jyl basynan beri Astananyń bes aýdanynda qalanyń dızaın-kodyna sáıkes kelmeıtin 2 600-den astam jarnamalyq mańdaısha men banner alynyp tastaldy.
Ákimdikterdiń qyzmetkerleri zańsyz jáne tıisti emes jarnamalardy, onyń ishinde bannerlerdi, mańdaıshalardy jáne dóńgelekterdegi jarnamalardy túsindirý jáne bólshekteý boıynsha kóshpeli is-sharalar uıymdastyrady.
Kásipkerlermen suhbat júrgiziledi, mańdaıshalardy dızaın-kodqa sáıkes keltirý týraly habarlamalar beriledi.
Bir apta ishinde ákimdik qyzmetkerleriniń jumysy nátıjesinde dızaın-kodqa sáıkes kelmeıtin myńǵa jýyq zańsyz ilingen banner men mańdaısha alynyp tastaldy.
Aıta keteıik, 2019 jyldyń jeltoqsanynda qala máslıhaty dızaın-kodty bekitti. Alaıda pandemııa bastalǵannan keıin jumys keıinge qaldyryldy. Al 2023 jyldyń 4 sáýirinde Astanany damytý máseleleri jónindegi keńeste Prezıdent Qasym-Jomart Toqaev kóshe jarnamasyn ornalastyrýǵa qoıylatyn talaptardyń saqtalýyn baqylaýdy kúsheıtýdi tapsyrdy.
Jaýapty mindet «Astana-Jarnama» kommýnaldyq memlekettik mekemesine júktelgen. Qazirgi ýaqytta ǵımarattardyń nemese qurylystardyń qasbetterine mańdaıshalardy ornalastyrý tujyrymdamasy ázirlendi.
Onda bıznes ókilderine elordanyń arhıtektýralyq kelbetin bir stılde júzege asyrýdyń úlgisi kórsetilgen.
