Astanada 195 kóshege jańa ataýlar berildi
ASTANA. Jeltoqsannyń 22-si. QazAqparat. Astana qalasy máslıhatynyń depýtattary dúısenbi kúni ótken 42-shi sessııasynda qalalyq onomastıkalyq komıssııanyń elorda kósheleriniń 195-ine jańa ataý berý týraly usynysyn qoldady,
dep habarlaıdy QazAqparat ákimdiktiń baspasóz qyzmetine silteme jasap.
«Onomastıka komıssııasy qazaq halqynyń dara tulǵalary men qazaqtyń tarıhy men mádenıetiniń damýyna eleýli úles qosqan tulǵalar Syrym batyr, Isataı batyr, Muhamedjan Seralın, Haıretdın Bolǵanbaev, Úshkúltaı Sýbhanberdına, Nurhan Ahmetbekov, Úmbeteı, Dospambet, Aqtamberdi jyraý, Shortanbaı, Súıinbaı aqyn, Latıf Hamıdı, Vasılıı Radlov, Borıs Erzakovıch, Bekzat Sattarhanov esimderin máńgi este qaldyrý maqsatynda kóshelerge sol kisilerdiń esimderin berý týraly sheshim qabyldady», - dedi máslıhat sessııasynda Tilderdi damytý basqarmasynyń bastyǵy Orazkúl Asanǵazy.
Onomastıkalyq komıssııaǵa «Internatsıonalnyı», «Ońtústik-Shyǵys», «Kúıgenjar», «Mıchýrın», «Aqbulaq-1, 2, 3, 4», «Saıajaı», «Telman», Ońtústik Shyǵystyń oń jaǵynda ornalasqan «Qaraótkel» qazaq aýyly, «Ilınka», «Shubar», «Kóktal» turǵyn alaptaryna, «Qaraótkel», «Úrker», shaǵyn aýdandarynyń jekelegen kóshelerine ataý berý máselesi boıynsha usynystar men ótinishter kelip tústi. Osy ýaqytqa deıin olar jobalyq ataýlarmen atalyp kelgendikten, nysandy jekemenshikke resimdegen kezde, túrli qyzmetterdi shaqyrý kezinde jáne t.b. qıyndyqtar týdyratyn.
Kóshege ataý berý jáne kósheni qaıta ataý úshin tarıhı-geografııalyq jáne tarıhı-mádenı ataýlar - Begazy-Dándibaı, Toqyraýyn, Tesiktas, Sozaq, Baıyrqum, Aqsúmbe, Sarykeńgir, Taldy, Taıqazan; dástúrli halyq uǵymdary Amanat, Shashý, Altybaqan, Básire, Bazarlyq, Bastańǵy; qazaq halqynyń mýzykalyq mádenı qazynasy men baılanysty ataýlar - ataqty kúıler Maıdaqońyr, Bozingen, Kókil, Shalqyma, Daraboz ataýlary tańdap alyndy.
Máslıhatta, sondaı-aq eki kósheni qaıta ataý sheshimi qabyldandy: Lomonosov kóshesi elimizdiń bas gazeti «Egemen Kazaqstan» ataýyn ıemdense, al Úshtóbe kóshesi ataqty qazaq aqyny, oıshyl, ǵalym Máshhúr Júsip Kópeıulynyń atymen atalatyn bolady.
Munan ózge, máslıhat depýtattary onomastıkalyq komıssııanyń kórnekti qoǵam jáne memleket qaıratkeri Qaıreden Qarbaıuly Qarbaevqa ózi turǵan Astana qalasy Á. Bókeıhan kóshesindegi 30-úıge memorıaldyq taqta ornatý, qalamger-ǵalym Aqseleý Slanuly Seıdimbekke ózi turǵan Astana qalasy K. Kúmisbekov kóshesindegi 6-úıge memorıaldyq taqta ornatý týraly usynysyn maquldady.
Munymen qosa, Astana qalasyndaǵy № 52 mektep-gımnazııasyna Batyr Baıannyń, № 54 mektep-gımnazııasyna belgili qoǵam qaıratkeri Aqseleý Seıdimbektiń, Astana qalasyndaǵy № 58 mektepke Kenesary Qasymulynyń, Astana qalasyndaǵy balalar óner mektebine Naǵymbek Jemaláddınuly Nurmuhamedovtyń esimderin berý týraly usynysy sessııa máslıhatynda bekitildi.
