Astanada 19 jastaǵy qyzdan bir keli mefedron men 300-den astam túıinshek tabyldy
ASTANA. KAZINFORM — Astanada esirtki saqtap, ony taratty degen kúdikpen 19 jastaǵy qyz ustaldy. Onyń jalǵa alǵan páterinen shamamen bir keli mefedron, 300-den astam daıyn túıinshek jáne esirtkini ólshep, oraýǵa arnalǵan quraldar tárkilendi.
Polıtseıler kúdiktini jedel-izdestirý is-sharalary barysynda turǵyn úıdiń kireberisinde ustaǵan. Keıin onyń jalǵa alǵan stýdııalyq páterine tintý júrgizildi.
As úıdegi shkaftan aq tústi untaq salynǵan plastık ydys tabyldy. Al bólmedegi aıaq kıim qorabynyń ishinen dál osyndaı zat salynǵan taǵy bir ydys shyqty. Sonymen qatar 300-den astam túıinshek pen esirtkini ólshep, oraýǵa arnalǵan qural-jabdyqtar tárkilendi.
Tárkilengen zattyń jalpy salmaǵy shamamen bir keli boldy. Saraptama onyń mefedron ekenin rastady.
Atalǵan fakti boıynsha qylmystyq is qozǵaldy. Kúdikti ýaqytsha ustaý ızolıatoryna qamaldy.
Aldyn ala málimet boıynsha, qyz esirtkini saqtap, keıin odan ári taratý úshin basqa adamdarǵa berip otyrǵan. Qazir quqyqqa qaıshy áreketke qatysy bolýy múmkin ózge de tulǵalar anyqtalyp jatyr.
Eske salaıyq, buǵan deıin Aqtaýǵa 113 kapsýla esirtki jutyp kelgen Iran azamaty sottalǵanyn habarlaǵan edik.
