Astana polıtsııasy 19 mln teńgeni alaıaqtardyń ıemdenýine jol bermedi
ASTANA. KAZINFORM – Bul týraly Astana qalasy Kommýnıkatsııalar qyzmetinde ınternet-alaıaqtyqtyń aldyn alý jóninde ótken baspasóz májilisinde Astana qalasynyń Polıtsııa departamenti Kıberqylmysqa qarsy is-qımyl basqarmasy bastyǵynyń orynbasary, polıtsııa podpolkovnıgi Sáken Alaýhanov aıtty.
– Qabyldanǵan sharalardyń nátıjesinde azamattardyń 19 mıllıon teńge kólemindegi qarajatyn alaıaqtardyń ıemdený áreketi toqtatyldy. Ekinshi deńgeıli banktermen júrgizilgen jumys kezinde kúmándi operatsııalar der kezinde anyqtalyp, qarajat buǵattaldy, - dedi spıker.
Sonymen qatar onyń sózinshe, «Qazaqtelekom» AQ-men birlesip ınternet-alaıaqtyq jasaýǵa baǵyttalǵan 36 árekettiń joly kesilgen. Budan bólek, ınternet keńistigindegi qaýipsizdikti arttyrý maqsatynda 4320 jalǵan habarlandyrý men zańsyz ınternet-resýrsty buǵattaý jóninde usynys joldanǵan.
Aıta keteıik, jyl basynan beri elordada ınternet-alaıaqtyqtyń 1530 faktisi tirkelip, 66 adam jaýapqa tartyldy.
