Astanada 18 jasqa tolǵan 34 366 azamat alǵash ret daýys beredi
NUR-SULTAN. QazAqparat - 9 maýsym kúni ótetin prezıdenttik saılaýda Nur-Sultan qalasynda 18 jasqa tolǵan 34 366 azamat alǵash ret daýys beredi. Bul týraly Oqýshylar saraıynda ótken semınar barysynda málim boldy, dep habarlaıdy QazAqparat.
Sharaǵa aýmaqtyq saılaý komıssııalarynyń músheleri, ýchaskelik saılaý komıssııalarynyń tóraǵalary men hatshylary, sot, tótenshe jaǵdaı jónindegi basqarma ókilderi qatysty.
Nur-Sultan qalasy ákiminiń orynbasary Erlan Qanalımov atap ótkendeı, saılaýshylardyń tizimi naqtylandy. Ákimdik ýákiletti memlekettik organdarmen birlese otyryp, «Jeke tulǵalar» memlekettik derekqory tizimindegi problemaly saılaýshylardy irikteý jumysyn júrgizgen. Nátıjesinde, mekenjaı boıynsha elordada tirkeýden shyǵyp ketken 60 240 adam anyqtalyp, tizimnen alynyp tastaldy. Jeke tulǵalar bazasynan alynǵan problemaly saılaýshylardyń málimetteri biryńǵaı esepteý ortalyǵy, densaýlyq saqtaý, bilim berý, salyq, sáýlet, Azamattarǵa arnalǵan úkimet sııaqty balamaly qalalyq bazalar arqyly tekserilgen. Sonyń nátıjesinde saılaýshylar jónindegi teris málimetter 150-den 43 myńǵa deıin azaıǵan.
Daýys berýshilerdiń tizimin naqtylaýdaǵy taǵy bir shara - jer úıler men páterlerdi aralaý. 15 sáýir - 6 mamyr aralyǵynda aýdan ákimdikteri barlyǵy 2 741 kópqabatty turǵyn úıdi, 269 784 páterdi, jeke sektordaǵy 32 872 úıdi aralaǵan. Osy jumystyń nátıjesinde 241 288 saılaýshy tizimge qaıta qosyldy. Sondaı-aq, bas qaladaǵy joǵary oqý oryndarynyń 57 myń stýdenti saılaýshylar tizimine qosyldy.
Erlan Qanalımovtyń aıtýynsha, elordada bıyl 18 jasqa tolyp, alǵash ret daýys beretin 34 366 adam bar. «El júregi - Nur-Sultan daýys beredi!» atty aktsııanyń sheńberinde olarǵa arnaıy logotıpi bar jeıde, qalpaq, saptyaıaq jáne ózge de syılyqtar tabystalady.
