Elordada 1,8 jasar búldirshindi kólik qaǵyp ketip, qaza tapty
ASTANA. KAZINFORM — «Kia Seltos» markaly avtokólik júrgizýshisi Imanov kóshesindegi úılerdiń biriniń aýlasynda kele jatyp, jolǵa júgirip shyqqan balany qaǵyp ketken.
Jol-kólik oqıǵasy saldarynan 1 jas 8 aılyq búldirshin oqıǵa ornynda qaza tapty.
Bul fakti boıynsha qylmystyq is qozǵalyp, qazir tergeý júrip jatyr.
— Polıtsııa júrgizýshilerge turǵyn úılerdiń aýlalary men aınalasynda aıryqsha saq bolý qajettigin eskertedi. Balalar kenetten jolǵa atyp shyǵýy múmkin ekenin esten shyǵarmaýǵa shaqyramyz. Al ata-analarǵa qaıǵyly jaǵdaılardyń aldyn alý úshin balalaryn jolǵa jaqyn tusta jáne aýlada qaraýsyz qaldyrmaýǵa keńes beremiz, — delingen Astana qalasy polıtsııa departamentiniń habarlamasynda.
Aıta keteıik, buǵan deıin Astanada 5 kúnde 1,5 myńnan astam jol erejesin buzý faktisi tirkelgenin jazǵanbyz.
