Astanada 173 aýla men qoǵamdyq keńistik abattandyrylady

ASTANA. KAZINFORM – Elordada bıyl 173 aýla men qoǵamdyq keńistikti abattandyrý jáne 1,1 mıllıonnan astam jasyl jelek otyrǵyzý josparlanyp otyr.

Bul týraly Astana qalasynyń ákimi Jeńis Qasymbek Instagram paraqshasynda málim etti.

– Memleket basshysyna bıylǵy abattandyrý jospary tanystyryldy. Elordada júzden astam qoǵamdyq jáne aýla aýmaǵyn jańartý, sondaı-aq aýqymdy kógaldandyrý jumystaryn júrgizý kózdelgen. Bul sharalar qalanyń ekologııalyq jaǵdaıyn jaqsartýǵa jáne turǵyndarǵa jaıly orta qalyptastyrýǵa baǵyttalǵan, – dep jazdy qala ákimi.

Negizgi jobalardyń biri – «Samal» saıabaǵyn abattandyrý. Joba aıasynda sport alańdary, sý aıdyny, serýendeý aımaqtary, jaıaý júrginshiler kópiri, balalar oıyn alańdary jáne belsendi demalysqa arnalǵan nysandar salynady. Saıabaq kópfýnktsıonaldy demalys ornyna aınalmaq.

Sondaı-aq «Myńjyldyq» alleıasynda úsh joba iske asyrylady. Olardyń qatarynda Qýanyshbaev teatry mańyndaǵy skver, vokzal aýmaǵyndaǵy saıabaq jáne «Nurly jol» vokzaly mańy bar. Bul aımaqtarda jańa jaıaý júrginshiler baǵyttary men kógaldandyrylǵan keńistikter paıda bolady.

Greenline jaıaý júrginshiler jelekjolynyń ekinshi kezeńi Tóle bı kóshesinen Ánet baba kóshesine deıin, sondaı-aq Kúltegin kóshesinen Aıtmatov kóshesine deıin jalǵasady. Munda da keshendi kógaldandyrý, sý nysandary men oıyn-sport alańdary qarastyrylǵan.

Budan bólek, Kenesary kóshesiniń 1,25 shaqyrymdyq ýchaskesi jańartylyp, Q.Muńaıtpasov atyndaǵy stadıon aldynda jańa alleıa salynady. Al Baýyrjan Momyshuly dańǵyly boıynda uzyndyǵy 1,5 shaqyrym bolatyn jaıaý júrginshilerge arnalǵan promenad paıda bolady.

Abattandyrý jumystary qalanyń barlyq aýdanynda júrgizilip jatyr.

Aıta keteıik, Astanada Smart City platformasy tolyq rejımde jumys isteı bastady.