Astanada 1700 adam qatysatyn «Astana UNICEF Race 2026» jarysy ótedi
ASTANA. KAZINFORM – Týrızm jáne sport mınıstri Erbol Myrzabosynov Qazaqstandaǵy Birikken Ulttar Uıymynyń Balalar qory (ıÝNISEF) Ókildiginiń basshysy doktor Rashed Mýstafa Sarvarmen kezdesti, dep habarlaıdy mınıstrliktiń baspasóz qyzmeti.
Erbol Myrzabosynov balalar men jasóspirimder sportyn damytý salasyndaǵy yntymaqtastyqty nyǵaıtýdyń mańyzdylyǵyn atap ótti.
-Qazaqstan úshin balalar men jasóspirimder sportyn damytý memlekettik saıasattyń basym baǵyttarynyń biri sanalady. Biz sportty bolashaq sportshylardy tárbıeleýdiń múmkindigi retinde ǵana qarastyrmaımyz. Eń aldymen, bul balalardyń densaýlyǵy, tártibi jáne ár balaǵa teń múmkindik berý, – dedi mınıstr.
Búginde Qazaqstanda 1,8 mln bala men jasóspirim, ıaǵnı olardyń 34,6%-y dene shynyqtyrýmen jáne sportpen turaqty túrde aınalysady. Ulttyq statıstıka bıýrosynyń málimetinshe, 2025 jylǵy 1 jeltoqsandaǵy jaǵdaı boıynsha elimizdegi tıisti jastaǵy balalar men jasóspirimderdiń jalpy sany 5 312 465 adamdy quraıdy.
Mınıstrlik balalardyń sporttaǵy qaýipsizdigi máselesine erekshe kóńil bóledi. 2025 jyly balalardyń sporttyq jarystarǵa qatysýyna jas erekshelikterine baılanysty shekteýler engizildi. Olar sport federatsııalarynyń usynystary eskerile otyryp ázirlenip, Densaýlyq saqtaý mınıstrligimen kelisildi jáne halyqaralyq standarttarǵa sáıkes keledi.
Qazirgi tańda Qazaqstanda 526 balalar men jasóspirimder sport mektebi jumys isteıdi. Onda shamamen 400 myń bala men jasóspirim sportpen shuǵyldanady. Bıyldan bastap balalar sportyna bólinetin qarjy kólemi eki esege jýyq arttyryldy.
Osyǵan baılanysty taraptar Astanadaǵy Botanıkalyq baq aýmaǵynda 20 qyrkúıekte ótetin «Astana UNICEF Race 2026» qaıyrymdylyq júgirisine daıyndyq máselesin jeke talqylady.
Sporttyq is-sharaǵa shamamen 1700 adam qatysady. Onyń ishinde 1500 eresek jáne 200 bala bar. Baǵdarlamada 2, 5 jáne 10 shaqyrymdyq qashyqtyqtar qarastyrylǵan. Qaıyrymdylyq júgirisin QR Týrızm jáne sport mınıstrligi, Qazaqstannyń jeńil atletıka federatsııasy, Astana qalasynyń ákimdigi jáne Qazaqstandaǵy ıÝNISEF Ókildigi uıymdastyrady.
Kezdesý barysynda uıymdastyrý máselelerine, qatysýshylardyń qaýipsizdigin qamtamasyz etýge, balalarǵa qolaıly jaǵdaı jasaýǵa, sondaı-aq dene shynyqtyrý men salaýatty ómir saltyn nasıhattaýǵa erekshe nazar aýdaryldy.
-Mundaı is-shara azamattardy belsendi ómir saltyna tartýmen qatar, qoǵamdy mańyzdy áleýmettik bastamalardyń tóńiregine biriktiredi. Aldaǵy is-shara eleýli oqıǵaǵa aınalyp, buqaralyq jáne balalar men jasóspirimder sportyn damytýǵa óz úlesin qosatynyna senimdimin, – dep atap ótti Erbol Myrzabosynov.
Kezdesý sońynda taraptar yntymaqtastyq týraly Memorandýmǵa qol qoıdy. Qujatta buqaralyq sportty damytý, balalar men jasóspirimderdiń sportpen qaýipsiz aınalysýyna jaǵdaı jasaý, balalardyń quqyqtaryn qorǵaý jáne olardyń ál-aýqatyn arttyrý baǵytyndaǵy birlesken jumysty jalǵastyrýǵa daıyn ekendikterin bildirdi.
Osyǵan deıin Erbol Myrzabosynov Qazaqstannyń mońǵol týrısteri men seriktesteri úshin ashyq ekenin aıtqan bolatyn.
