Astanada 17 shaǵyn emhana ashylady
ASTANA. QazAqparat - Elordalyq medıtsınanyń aldynda týyndap otyrǵan basty másele halyq sanynyń turaqty negizde orta eseppen 40 myń adamǵa ósýi. Bul týraly Astana qalasy qoǵamdyq keńesiniń otyrysynda qalalyq densaýlyq saqtaý basqarmasynyń basshysy Erik Baıjúnisov málim etti.
Onyń aıtýynsha, búgingi kúni Astanada bir mıllıon halyq turady, al qalalyq emhanalar 500-600 myń adamǵa eseptelgen, sol sebepti bir jarym ese júktemeni kóterýge májbúr.
«Biz birinshi sanıtarlyq medıtsınalyq kómek kórsetý ortalyǵynyń (BSMK) ekeýin emhana etip qaıta qurdyq, bul «Shapaǵat» otbasylyq densaýlyq ortalyǵy jáne Ilınka aýylyndaǵy ortalyq. Qazir olardy qajet qural-jabdyqtarmen jabdyqtap, kadrlarmen qamtamasyz etý jumystary júrgizilýde, nátıjesinde ortalyq emhanalarǵa júkteme azaıatyn bolady», - dedi E. Baıjúnisov.
Sondaı-aq, ol Astanada memlekettik-jeke menshik áriptestik tetigi boıynsha 8 emhana salynyp, hospıs ashylatynyn, qala boıynsha 17 shaǵyn emhanany iske qosý josparlanyp otyrǵanyn jetkizdi. Jańashyldyqtardyń taǵy biri biryńǵaı medıtsınalyq kartaǵa, odan keıin genomdyq medıtsınaǵa kóshý.
«Genomdyq medıtsına - bala týǵan kezde onyń qandaı aýrýlarǵa beıim ekenin anyqtaýǵa kómektesedi», - dedi ol.
Medıtsına salasyndaǵy barlyq jańashyldyqtar Astana qalasynyń ákimi Áset Isekeshevtiń tapsyrmasymen ázirlengen «Astana - densaýlyq qalasy» baǵdarlamasy sheńberinde engizilýde. Joba aýrýlardyń aldyn alýdy qarastyrady, sondaı-aq onda halyqty salaýatty ómir saltyna baýlýǵa erekshe nazar aýdarylǵan. Erik Baıjúnisovtyń aıtýynsha, salaýatty ómir saltyn ustaný onkologııalyq jáne basqa da aýrýlarǵa shaldyǵý qaýpin 20%-ǵa tómendetedi, dep jazady «Egemen Qazaqstan».
