Astanada 1,7 mln teńge memlekettik grantty kimder ala alady
ASTANA. KAZINFORM – Qazaqstanda áleýmettik osal sanattaǵy azamattardy qoldaýǵa baǵyttalǵan memlekettik granttar baǵdarlamasy júzege asyrylyp keledi. Baǵdarlama aıasynda jańa bıznes-ıdeıalardy iske asyrý úshin 400 aılyq eseptik kórsetkish kóleminde qaıtarymsyz grant beriledi. 2026 jyly bul soma 1 mln 730 myń teńgeni quraıdy.
Memlekettik grant shaǵyn bıznesti damytýǵa, azamattardyń kásipkerlik bastamalaryn qoldaýǵa jáne jańa jumys oryndaryn ashýǵa baǵyttalǵan.
Grant qarajatyn qural-jabdyqtar men tehnıka satyp alýǵa, mal, tuqym jáne kóshet alýǵa, óndiristik úı-jaılardy jalǵa alýǵa, sondaı-aq bıznes-jobany júzege asyrýǵa qajetti ózge de shyǵyndardy jabýǵa paıdalanýǵa bolady.
Alaıda qarajatty jeke qajettilikterge jumsaýǵa, turǵyn úı satyp alýǵa, nesıeler men basqa da qaryzdardy óteýge paıdalanýǵa ruqsat etilmeıdi.
Grantqa ataýly áleýmettik kómek alýshylar, kópbalaly otbasylardyń músheleri, asyraýshysynan aıyrylǵan azamattar, múgedektigi bar adamdar, múgedektigi bar bala tárbıelep otyrǵan tulǵalar, qonys aýdarýshylar jáne qandastar úmitker bola alady.
Baǵdarlamaǵa qatysý úshin ótinim berýshi jumyssyz retinde tirkelýi nemese tirkelgenine bir jyldan aspaǵan jeke kásipker bolýy qajet. Sonymen qatar sońǵy úsh jyl ishinde «Bastaý Bıznes» jobasy boıynsha oqýdy aıaqtaǵanyn rastaıtyn sertıfıkaty bolýy tıis.
Úmitker bıznes-jospar ázirlep, onda jobanyń sıpattamasyn, qarjylyq esepterin jáne kútiletin nátıjelerin kórsetýi kerek.
Astana qalasy ákimdiginiń Eńbek mobıldiligi ortalyǵy dırektory Oljas Omardyń aıtýynsha, memlekettik aqparattyq júıeler arqyly júrgiziletin tekserý kezinde birqatar azamattardyń ótinimderi avtomatty túrde keri qaıtarylady.
«Eńbek sharty boıynsha resmı jumysy bar azamattar, nesıeleri boıynsha merzimi ótken bereshegi bar tulǵalar, buryn jumyspen qamtý nemese kásipkerlikti qoldaý baǵdarlamalary aıasynda memlekettik grant nemese mıkrokredıt alǵan azamattar konkýrsqa qatysa almaıdy. Sondaı-aq bankrot dep tanylǵan adamdarǵa, zeınetkerlerge jáne ótinim bergenge deıingi alty aı ishinde jeke kásipkerligin japqan tulǵalarǵa grant berilmeıdi. Eger kásipkerlik qyzmet lıtsenzııany talap etse jáne úmitkerde tıisti lıtsenzııa bolmasa, bul da bas tartýǵa negiz bolady», – dedi ol.
Bıyldan bastap grant alýshylar úshin jańa talaptar engizildi. Buryn jobalardy baqylaý merzimi bir jyl bolsa, endi monıtorıng eki jyl júrgiziledi.
Sonymen qatar grant ıegeri alǵashqy 18 aı ishinde keminde bir jańa jumys ornyn ashyp, Mansap ortalyǵy jibergen azamatty turaqty jumysqa qabyldaýy tıis.
Taǵy bir jańashyldyq – eseptiliktiń kúsheıýi. Endi kásipkerler business.enbek.kz portaly arqyly eki jyl boıy ár úsh aı saıyn bıznes-jobanyń júzege asyrylýy týraly esep berip otyrady.
Aqparattyń ashyqtyǵyn qamtamasyz etý maqsatynda grant ıeleri, iske asyrylyp jatqan jobalar jáne qurylǵan jumys oryndary týraly málimetter jyl saıyn 10 sáýirge deıin jarııalanyp otyrady.
Baǵdarlamaǵa qatysýshylardy irikteý ashyq formatta júrgiziledi. Komıssııa quramy ár kezeń saıyn tolyq jańartylyp, otyrystar mindetti túrde aýdıo jáne beınejazbaǵa túsiriledi. Ótinimderdi qaraý protsesi tikeleı efırde kórsetiledi.
Qoǵamdyq baqylaýdy qamtamasyz etý úshin komıssııa jumysyna depýtattar, buqaralyq aqparat quraldarynyń, qoǵamdyq uıymdar men bıznes qaýymdastyqtardyń ókilderi táýelsiz baqylaýshy retinde qatysa alady.
Aıta keteıik, buǵan deıin 2026 jylǵy shaǵyn granttar baıqaýynyń jeńimpazdary anyqtaldy.
