Astanada 17 myńnan astam qyz bala APV-ǵa qarsy ekpe aldy
ASTANA. KAZINFORM – Astanada ótken jyldyń 20 qyrkúıeginen beri 17 myńnan astam qyz bala adam papıllomasy vırýsyna (APV) qarsy vaktsına aldy.
Bul týraly Astana qalasynyń sanıtarııalyq-epıdemıologııalyq baqylaý departamentiniń basshysy Aıgúl Shaǵaltaeva Óńirlik kommýnıkatsııalar qyzmetinde ótken brıfıngte aıtty.
Onyń sózinshe, Ulttyq profılaktıkalyq egý kúntizbesi aıasynda 11–13 jastaǵy qyz balalarǵa AQSh-ta óndirilgen tórt valentti «Gardasıl» vaktsınasymen josparly vaktsınatsııa júrgizilip keledi.
– Búginge deıin vaktsınanyń birinshi dozasy 17 567 qyz balaǵa, ekinshi dozasy 10 652 qyz balaǵa egildi, – dedi Aıgúl Shaǵaltaeva.
Sondaı-aq bıyl 18 mamyrdan bastap 14–18 jas aralyǵyndaǵy qyz balalardy qosymsha vaktsınatsııalaý bastaldy. Bul sanattaǵy jasóspirimderge ekpe 0–2–6 aılyq shema boıynsha úsh kezeńmen salynady.
– Qazirgi ýaqytta qosymsha ımmýndaý aıasynda birinshi dozany 708 qyz bala qabyldady. Ekinshi doza 52 qyz balaǵa egildi, – dedi departament basshysy.
Spıkerdiń aıtýynsha, APV-ǵa qarsy tegin vaktsınatsııa qyz balalardyń densaýlyǵyn qorǵaýǵa baǵyttalǵan memlekettik baǵdarlama aıasynda júrgizilip jatyr. Ekpe alý úshin ata-analar ózderi tirkelgen emhanaǵa nemese mekteptiń medıtsınalyq pýnktine júgine alady.
Eske salaıyq, buǵan deıin APV-ǵa qarsy vaktsınatsııa baǵdarlamasyna ul balalardy engizýdiń mańyzy men halyqaralyq tájirıbe týraly jazǵan edik.
