Astanada 164 kásipkerge 3,2 mıllıon teńge aıyppul salyndy
ASTANA. KAZINFORM — Bıylǵy birinshi jartyjyldyqta tutynýshylardyń quqyqtaryn qorǵaý salasyndaǵy zań talaptaryn buzǵan 164 kásipkerlik sýbektisi ákimshilik jaýapkershilikke tartyldy. Bul týraly Astana qalasy boıynsha Saýda jáne tutynýshylardyń quqyqtaryn qorǵaý departamentiniń basshysy Erkebulan Taǵashov málim etti.
— Zań talaptaryn buzǵan 164 kásipkerlik sýbektisi ákimshilik jaýapkershilikke tartyldy. Salynǵan aıyppuldardyń jalpy somasy 3,2 mıllıon teńgeni qurady, — dedi Erkebulan Taǵashov.
Onyń aıtýynsha, tutynýshylar men kásipkerler arasyndaǵy daýlardyń basym bóligi sotqa jetkizilmeı sheshilgen.
— Zań talaptary túsindirilgennen keıin kóptegen kásipker tutynýshylarǵa aqshasyn erikti túrde qaıtaryp, shart boıynsha mindettemelerin oryndady, — dedi departament basshysy.
Erkebulan Taǵashov tutynýshylarǵa quqyqtary buzylǵan jaǵdaıda aldymen satýshyǵa, oryndaýshyǵa nemese óndirýshige jazbasha talap qoıý qajet ekenin eske saldy.
— Eger 10 kúntizbelik kún ishinde jaýap berilmese nemese talap oryndalmasa, talaptyń kóshirmesin, shartty (bar bolsa), tólem qujattaryn jáne quqyqtyń buzylǵanyn rastaıtyn ózge de materıaldardy qosa tirkep, Saýda jáne tutynýshylardyń quqyqtaryn qorǵaý departamentine júginýge bolady, — dedi ol.
Sonymen qatar, azamattar sot arqyly óz quqyqtaryn qorǵaýǵa, tólengen qarajatty qaıtarýdy, keltirilgen zalaldy óteýdi, moraldyq zııan úshin ótemaqy óndirip alýdy, turaqsyzdyq aıyby men sot shyǵyndaryn óndirip alýdy talap etýge quqyly.
— Qajet bolǵan jaǵdaıda departament sot protsesine úshinshi tulǵa retinde qatysyp, is boıynsha qorytyndy bere alady, — dep tolyqtyrdy Erkebulan Taǵashov.
Aıta keteıik, buǵan deıin elordada tutynýshylardan túsken shaǵymdar sanynyń 55 paıyzǵa artqany týraly jazǵan edik.
