Astanada 1,6 mlrd teńge jymqyrǵan kásiporyn basshylary sottaldy
ASTANA. KAZINFORM – Astana qalasynyń mamandandyrylǵan aýdanaralyq qylmystyq ister jónindegi soty memlekettik qorǵanys tapsyrysy salasyndaǵy qarajat jymqyrý deregi boıynsha rezonanstyq isti qaraýdy aıaqtady.
Eske salaıyq, 2023 jyly Qarjylyq monıtorıng agenttigimen «Kazspetseksport» RMK-nyń laýazymdy tulǵalary men teris pıǵyldy jetkizýshiler ustalyp, áskerı maqsattaǵy ónimderdi satyp alýǵa bólingen bıýdjet qarajatyn jymqyrdy jáne sybaılas jemqorlyq derekteri boıynsha aıyp taǵylǵan bolatyn.
Qarjylyq monıtorıng agenttigi málimetinshe, memleketke keltirilgen zalal 1,6 mlrd teńgeden asty. Sot úkimimen «Kazspetseksport» RMK bas dırektory Ramazanov A.K. 11 jylǵa bas bostandyǵynan aıyryldy, al kásiporynnyń departament dırektory Kýdabaev A.T. 10 jylǵa sottaldy.
Qalǵan 9 aıyptalýshy da ártúrli merzimge bas bostandyǵynan aıyryldy. Sonymen qatar sot memleket paıdasyna 1,6 mlrd teńge kólemindegi azamattyq talap-aryzdy qanaǵattandyryp, jalpy quny 607 mln teńge bolatyn múlikti tárkiledi.
Úkim zańdy kúshine engen joq.
Aıta keteıik, Ulytaýda bilim basqarmasynyń basshysy 8 jylǵa sottaldy.