Astanada 1500-den astam ınternet-alaıaqtyq faktisi tirkeldi
ASTANA. KAZINFORM — Bul týraly Astana qalasy Kommýnıkatsııalar qyzmetinde ınternet-alaıaqtyqtyń aldyn alý jóninde ótken baspasóz májilisinde Astana qalasynyń Polıtsııa departamenti Kıberqylmysqa qarsy is-qımyl basqarmasy bastyǵynyń orynbasary, polıtsııa podpolkovnıgi Sáken Alaýhanov aıtty.
— Astanada ınternet-alaıaqtyqqa qarsy kúres jáne onyń aldyn alý boıynsha keshendi jumystar jalǵasyp jatyr. Jyl basynan beri elordada ınternet-alaıaqtyqtyń 1530 deregi tirkelgen. Bul kórsetkish ótken jyldyń sáıkes kezeńimen salystyrǵanda aıtarlyqtaı ózgergen joq, — dedi spıker.
Basqarma bastyǵy orynbasarynyń sózinshe, azamattardyń bank kartalary men shottaryn zańsyz paıdalanýǵa baılanysty dropperliktiń 51 faktisi anyqtalǵan.
— Jyl basynan beri ınternet-alaıaqtyq faktileri boıynsha 66 adam ustalyp, jaýapkershilikke tartyldy. Olardyń qatarynda asa iri kólemde shyǵyn keltirgen qylmystarǵa qatysy bar úsh shetel azamaty bar. Sonymen qatar SIM-kartalardy zańsyz tirkeý jáne WhatsApp akkaýnttaryn úshinshi tulǵalarǵa berý boıynsha bes adam qolǵa tústi, — dedi Sáken Alaýhanov.
Quqyq qorǵaý organdary zańsyz aınalymnan 420 SIM-karta, 12 uıaly telefon jáne bir kompıýter tárkilegen.
Eske salaıyq, Astanada ınternet-alaıaqtyqtyń aldyn alýǵa arnalǵan qysqametrajdy fılm túsirildi.
