Astanada 15 jańa densaýlyq saqtaý nysany salynbaq
ASTANA. KAZINFORM - Elordada 2027 jylǵa deıin 15 densaýlyq saqtaý nysanyn ashý josparlanyp otyr. Qalanyń Densaýlyq saqtaý basqarmasynyń basshysy Álııa Rústemova elorda medıtsınasynyń ınfraqurylymdyq damýy týraly tolyǵyraq aıtyp berdi, dep habarlaıdy Astana ákimdiginiń resmı saıty.
Josparlanǵan iri nysandardyń ishinde 2 perınataldyq ortalyq, 2 jańa zamanaýı kópsalaly aýrýhana, onyń biri balalar aýrýhanasy, 2 memlekettik jáne 3 jeke emhana bar.
«Jyl saıyn elorda turǵyndarynyń sany 60-70 myń adamǵa kóbeıedi, bul týý kórsetkishiniń artýynan jáne basqa aımaqtardan kóshi-qon esebinen. Árıne, qolda bar densaýlyq saqtaý ınfraqurylymy jetkiliksiz. Mysaly, qaladaǵy sońǵy memlekettik nysan 2015 jyly iske qosyldy. Odan beri 9 jyl ótti, al jańa memlekettik nysandar joq. Sondyqtan bizge aldaǵy jyldary jańa densaýlyq saqtaý nysandaryn paıdalanýǵa berý mindeti júkteldi. Jańa nysandardy salý jáne ashý boıynsha bekitilgen jobalar bar», - deıdi Densaýlyq saqtaý basqarmasynyń basshysy.
Aldaǵy jyldarǵa eki memlekettik emhana salý jáne jeke ınvestıtsııalar aıasynda úsh jańa emhana ashý josparlanyp otyr.
«Bıyl №1 kópsalaly qalalyq balalar aýrýhanasy men ulttyq shuǵyl medıtsınany úılestirý ortalyǵynyń bazalarynda 2 balalar travmatologııalyq pýnktin ashý josparlanyp otyr. Budan ári №2 qalalyq kópbeıindi aýrýhana bazasynda (Akýsherlik jáne klınıkalyq bloktar arasynda salynyp jatqan qabyldaý-dıagnostıkalyq keshende) jaraqat pýnktin ashý máselesi qaralyp jatyr», - dep bólisti Álııa Rústemova.
Ol burynǵy temirjol aýrýhanasynyń (qazir №3 kópsalaly qalalyq aýrýhana) jaǵdaıy týraly da aıtty.
«Bul qalanyń alǵashqy aýrýhanalarynyń biri. Ol 1959 jyly salynǵan. Saryarqa aýdanynda №3 jańa aýrýhana salý josparlanyp otyr. Osylaısha biz statsıonarlyq tósekterge degen qajettilikti óteı alamyz dep úmittenemiz», - dep túsindirdi vedomstvo basshysy.
Ol tósek oryndaryna degen qajettilik tek eresekter men balalar statsıonarlarynda ǵana emes, sonymen qatar akýsherlik bloktarda da bar ekenin atap ótti.
«Tósek qorynyń joǵary qajettiligi elorda mártebesimen tartymdy bolýymen baılanysty. Tıisinshe áıelderdiń Astanada bosaný nıetine kúrt áser etedi. Biz bosandyrýdan bas tartpaımyz jáne bárin qabyldaımyz. Qazir qalada tek úsh perzenthana bar, bul jetkiliksiz. Turǵyndar sanynyń ósýin eskere otyryp, qajettilik shamamen 500 akýsherlik kerýetti quraıdy», - dep tolyqtyrdy Álııa Rústemova.
Búginde respýblıkalyq jáne Ulttyq ǵylymı ortalyqtardy eskere otyryp, qala boıynsha tósek qory – 3775, onyń ishinde 1622 tósek – qalalyq statsıonarlar.
