Astanada 15 naýryz kúni qoǵamdyq kólik tegin qatynaıdy

ASTANA.KAZINFORM - Astana qalasynda 15 naýryz kúni ótetin respýblıkalyq referendýmge baılanysty qalalyq, ekspress jáne qala mańyndaǵy avtobýs baǵyttarynda jol júrý tegin bolady, dep jazdy elorda ákimdiginiń resmı saıty.

Bul kúni qala turǵyndary men qonaqtary qoǵamdyq kólikpen aqysyz qatynaı alady. Bul is-shara azamattardyń qatynaýyn jeńildetý jáne daýys berý ýchaskelerine jetýdi ońaılatý úshin qabyldandy.

Qoǵamdyq kólik belgilengen kestege sáıkes shtattyq rejımde – saǵat 06:00-den 23:00-ge deıin jumys isteıdi.

Al 16 naýryzdan bastap qoǵamdyq kólik qalypty rejımde qyzmet kórsetedi. Jolaýshylar osy aqparatty eskergeni jón.

Aıta keteıik, Túrkistannyń birneshe qalasynda referendým kúni avtobýstar tegin qatynaıdy.