Astanada 15 mlrd teńgege jýyq bıýdjet qarjysy ıgerilmegen
ASTANA. KAZINFORM — Elordada bıýdjet qarajatyn ıgermegen basqarmalar máselesi kóterildi.
Bul týraly Astana qalasy máslıhatynyń elordanyń 2025 jylǵy bıýdjetiniń atqarylýy týraly esepti bekitýge arnalǵan sessııasynda qalalyq máslıhattyń bıýdjet, ekonomıka, ónerkásip jáne kásipkerlik máseleleri jónindegi turaqty komıssııa tóraǵasy Kendebaı Adambek aıtty.
— Astanada bıýdjet qarajatyn ıgerý deńgeıi 99,3%-dy qurady. Bir qaraǵanda, 0,7% az bolyp kórinýi múmkin. Alaıda bul shamamen 15 mlrd teńge. Sonda shamamen osyndaı qarjy ıgerilmegen, — dedi spıker.
Turaqty komıssııa tóraǵasynyń sózinshe, qurylys salasyna jaýapty basqarma, bilim berý salasyna jaýapty basqarma, sondaı-aq tótenshe jaǵdaılar departamenti bıýdjetti tolyq ıgermegen.
— Bilim berý salasyndaǵy bıýdjettiń tolyq ıgerilmeýi balabaqshalardaǵy balalar sanynyń azaıýy jáne mektepter boıynsha josparlanǵan kórsetkishterdiń naqty oryndalmaǵanynan bolyp otyr, — dedi spıker.
Ol bıýdjet qarajatynyń ıgerilý máselesi turaqty túrde qaralatynyn atap ótti. Bıyl jyl basynda bıýdjet kodeksine sáıkes tıisti taldaý júrgizilip, múddeli basqarmalardan aqparat alynǵan, sondaı-aq depýtattyq saýaldar joldanǵan.
Onyń aıtýynsha, keı jaǵdaılarda jaýapty tulǵalarǵa qatysty tártiptik sharalar qabyldanyp, birqatar qyzmetker qyzmetinen bosatylǵan. Degenmen depýtat negizgi maqsat jazalaý emes, mundaı jaǵdaılardyń aldyn alý ekenin aıtty.
Sonymen qatar ol ákimdikke bıýdjet qarajatyn josparlaý jáne ıgerý protsesin kúsheıtip, baqylaýdy arttyrý qajettigin eskertti.
Buǵan deıin Parlament byltyrǵy bıýdjettiń ıgerilýin qaraıtyny jaıly jazǵan edik.
